ԵԼՔ ԿԱՙ ՆԱԽԱԳԱՀ ՍԱՐԳՍՅԱՆԻ ԳԼԽԱՎՈՐՈՒԹՅԱՄԲ ՀՈՎԻԿ ԱՖՅԱՆ ԱԺ փոխնախագահ Էդուարդ Շարմազանովը խորհրդարանում կառավարության ծրագրի քննարկման ժամանակ առիթ է գտել եւ արտահերթ ելույթով պատասխանել է «Ելք»-ի պատգամավոր Էդմոն Մարուքյանի հարցին: Իսկ Մարուքյանին գործադիրի ծրագրի քննարկումներում հետաքրքրել էր, թե ո՞վ է լինելու ՀՀ վարչապետը 2018-ից հետո: Շարմազանովն ասել է բառացիորեն հետեւյալը. «Մենք այլեւս խորհրդարանական հանրապետություն ենք, իսկ ընտրություններին ժողովուրդը վստահության քվեն տվել է քաղաքական կոալիցիոն ուժերինՙ ՀՀԿ-ինՙ Սերժ Սարգսյանի գլխավորությամբ ու ՀՅԴ-ին: Հետեւաբար, անկախ 2018-ին վարչապետի անձից, գործ պետք է ունենաք քաղաքական իշխանության հետՙ ՀՀԿ-ի եւ ՀՅԴ-ի հետ, մեր պարագայում գործ պետք է ունենաք ՀՀԿ-ի հետՙ նախագահ Սարգսյանի գլխավորությամբ»: Իհարկե Շարմազանովը մոռացել է, որ 2018-ը հենց այն տարին է, երբ Սարգսյանին այլեւս չենք ասելու նախագահ, քանի որ լրանում է վերջինիս երկրորդ ժամկետը եւ ինչպես ինքն է բազմիցս ասել, նա չի պատրաստվում նորից դառնալ նախագահ: Բայց սաՙ իմիջիայլոց: Կարեւորն այն է, որ պարզ չէ, «դուք պետք է գործ ունենաք» ասելով պարոն Շարմազանովը սպառնացե՞լ է... Ամեն դեպքում ելք կաՙ նախագահ Սարգսյանի գլխավորությամբ անշուշտ: | 
