«ՍԱՐՍԱՓԻՑ ԴԵՊԻ ՀՈՒՅՍ» ԳԻՐՔԸՙ ՄՐՑԱՆԱԿԱԿԻՐ Հ. Ծ. Անկախ ընկերակցությունների կողմից հաջորդ սերունդների համար հրատարակած գրքերի այս տարվա մրցանակը հանձնվել է «Սարսափից դեպի հույս» հատորին, տեղեկացնում է «Արմինյն Միրոր Սփեքթեյթր» շաբաթաթերթը: Գիրքը պարունակում է Հայոց ցեղասպանությունը վերապրածների 66 պատմություններ-հիշողություններ, եւ մրցանակի է արժանացել հենց հուշագրության բնագավառում: «Հուշագրությունների հեղինակները Ֆիլադելֆիայում ապաստանած հայերն են, որոնք դրանով ցանկանում են հաստատել, որ մենք ոչ միայն վերապրեցինք, այլեւ բարգավաճեցինք», նշել է այդ առթիվ Մարգո Փարնակյան-Սիլկը, որն էլ մտահղացել է նման գիրք հրատարակել 2015-ին, Հայոց ցեղասպանության հարյուրամյակի տարին: «Կարեւոր էր այդ բոլորը փոխանցել հաջորդ սերունդներին: Մենք կամրջի դերն ենք կատարել», եզրակացրել է նա: Գրքի հրատարակությունը հնարավոր է դարձել տարածաշրջանի 5 եկեղեցիների միասնական ջանքերի շնորհիվ: Մրցանակաբաշխության արարողությունը տեղի է ունեցել Նյու Յորքի «Հարվարդ ակումբում»: Մրցանակը ստացել են Մարգո Փարնակյան-Սիլկն ու Քերոլ Լոնգ Գարաբաշյանը: Բանահավաք խմբի մյուս անդամներն են եղել Կարեն Ազնավուրյան-Կաուսկիոն, Մերեդիթ Խանամիրյանը, Լիզա Մանուկյանը, Սյուզան Շիրինյանը եւ Պոլ-Վարդան Սուքիասյանը: Որպես խորհրդատու է ծառայել Արթուր Պետրոսյանը Ամերիկայի հայկական եկեղեցու արեւելյան թեմից: Մրցանակաշխությանը մասնակցել են ավելի քան 2000 գրքեր: | 
