ԻՆՆՈՒԻՏՆԵՐԻ ԱՐՎԵՍՏԻ ՑՈՒՑԱԴՐՈՒԹՅՈՒՆ ԲՈՍՏՈՆՈՒՄ Հ. Ծ. Անգլիական խորհրդարանը 1867-ին ընդունեց Բրիտանական Հյուսիսային Ամերիկայի մասին ակտ, որի համաձայն ստեղծվեց կանադական ֆեդերացիան: Ֆեդերացիայի ստեղծման 150-ամյակի առթիվ Բոստոնի գեղարվեստի թանգարանը կազմակերպել է Կանադայի մոնղոլոիդ ռասայի արկտիկական խմբերին պատկանող Իննուիտների (Էսկիմոսների ինքնանվանումը) ձեռքի աշխատանքների (փորագրանկարներ, վիմաքանդակներ, գրաֆիկայի հաստոցային ստեղծագործությունների առանձնատիպեր) յուրահատուկ ցուցահանդես, որը բացվել է, ըստ «Արմինյն Միրոր-Սփեքթեյթր» շաբաթաթերթի տեղեկության, հուլիսի 1-ին եւ շարունակվելու է մինչեւ այս տարվա դեկտեմբերի 31-ը թանգարանի Բեռնար եւ Բարբարա Ստեռն Շապիրո պատկերասրահում: Ներկայացվել են իննուիտ արվեստագետներիՙ Քենոխուակ Աշեւակի, Ագնես Նանոջակի, Ջեսսի Ունարկի, Պուդլո Պուդլատի եւ Լյուսի Կիննուայաուակի ստեղծագործությունները, որոնց մեծ մասը վիմաքանդակներ են պատրաստված Դորսետ հրվանդանի դրոշմահաստոցային կոոպերատիվում: Աշխատանքները, որոնք թեմատիկորեն առանձնացված են, Բոստոնի թանգարանի ցուցադրության համար տրամադրել են կանադահայ անվանի լուսանկարիչ Յուսուֆ Քարշի եւ կնոջըՙ Օստրելիտայի կալվածքի պատասխանատուները: |
