ՀԱԼԵՊՈՒՄ ՎԵՐԱԲԱՑՎԵԼ Է ՀԱՅԿԱԿԱՆ ՍՐՃԱՐԱՆԸ Հ. Ծ. Սիրիական բանակի կողմից քաղաքի վերագրավումից 6-7 ամիս անց Հալեպի «Մեյդան» կոչվող հայկական թաղամասում վերաբացվել է Մինասյանների սրճարան-ճաշարանը, տեղեկացնում է «Ֆրանսպրես» գործակալության լրագրող Ռանա Մուսաուին: Հանգիստ տրամադրությունն ու աշխույժ խոսակցությունները վերականգնվել են: «Երազի նման է հինգ տարվա արյունալի պատերազմից հետո տեսնել դարձյալ տասնյակ հաճախորդների», նշել է Թալին Մինասյանը լրագրողի հետ զրուցելիս: «Ես հիշում եմ, թե ինչպես մոտ 40 հրթիռներ ռմբակոծեցին այս վայրը: Մեյդանը համարյա ամայացած վայր դարձավ»: Ռմբակոծություններն ավերեցին նաեւ Մինասյանների տունը, բայց չկարողացան կոտրել նրանց ապրելու կամքը եւ հավատը: Նրանք չլքեցին քաղաքը եւ հույս ունեն, որ կաֆե-ռեստորանի վերաբացումը դիմադրության խորհրդանիշ կդառնա, եւ մարդիկ կվերադառնան իրենց քաղաքը, որ մի ժամանակ 150 հազար հայերի ապաստան էր եղել: Բացօթյա սրճարանը բացվել էր 2007-ին եւ շուտով դարձել փնտրված վայր իր ջերմ ընտանեկան մթնոլորտի շնորհիվ: | 
