ՊԱՐՈՒՅՐ ՀԱՅՐԻԿՅԱՆԸ ՀԵՏԱՁԳԵԼ Է ՔԱՐՈԶԱՐՇԱՎՆ ՈՒ ԳՈՒՑԵ ԴԻՄԻ ՍԱՀՄԱՆԱԴՐԱԿԱՆ ԴԱՏԱՐԱՆ Հ. Հ. Վերջին երկու օրվա ընթացքում նախագահի թեկնածու, ԱԻՄ առաջնորդ Պարույր Հայրիկյանի առողջական վիճակը ոչ միայն չի բարելավվել, այլեւ ընդհակառակըՙ վատացել է: Հայրիկյանը հիվանդանոցում է, նա չի կարողանում շարժել աջ ձեռքի մատները, քանի որ վնասվել է նյարդն, ու դրա բուժումն ամիսներ կտեւի: Հայրիկյանի շտաբից «Ազգ»-ին տեղեկացրին, որ Հայրիկյանը չի կարողանում պատասխանել իրեն ուղարկված նամակներին, չի կարողանում քարոզարշավ կազմակերպել, բժիշկներն էլ նրան արգելել են դուրս գալ հիվանդանոցից: Հայրիկյանի շտաբում գոհ չեն իրավապահ մարմիններից: Մասնավորապես իրավապահ մարմինները կատարվածը բացահայտելու ուղղությամբ դեռ որեւէ բան չեն հրապարակել: Այս ամենը հաշվի առնելով, Հայրիկյանի շտաբի համակարգող Մանյա Այվազյանն ասաց, թե իրենք չեն բացառում, որ Հայրիկյանը կդիմի Սահմանադրական դատարան: Այժմ որեւէ որոշում դեռ չի կայացվել, սակայն Հայրիկյանի համար մահափորձն անհաղթահարելի խոչընդոտ է, քանի որ նա չի կարողանում քարոզարշավ անցկացնել: Հունվարի 31-ին երեկոյան 23:30-ի սահմաններում Տպագրիչների փողոցի թիվ 9 շենքի բակում անհայտ անձը հրազենից կրակ էր արձակել նախագահի թեկնածու Պարույր Հայրիկյանի վրաՙ աջ անրակի շրջանում պատճառելով հրազենային վնասվածք: Հայրիկյանը տեղափոխվել էր «Սուրբ Գրիգոր Լուսավորիչ» բժշկական կենտրոն: Փաստի առթիվ հարուցվել է քրեական գործ ՀՀ ՔՕ 34-305 հոդվածիՙ պետական, քաղաքական կամ հասարակական գործչի սպանության փորձի հատկանիշներով: Ստեղծվել է համատեղ օպերատիվ-քննչական խումբ, որում ընդգրկվել են ՀՀ ոստիկանությունն ու ԱԱԾ-ն: Դեպքի վայրի զննությամբ հայտնաբերվել է 7,62 ,մմ տրամաչափի 1 գնդակ: Նշանակվել է համալիր փորձաքննություն: Քննությունը վարում է ՀՀ ԱԱԾ քննչական վարչությունը: Շաբաթասկզբին Հայրիկյանը հայտարարեց, որ չի պատրաստվում դիմել Սահմանադրական դատարանՙ ընտրությունները հետաձգելու պահանջով: Եթե նախագահի թեկնածուն դիմի Սահմանադրական դատարան, ապա ընտրությունները կհետաձգվեն 15 օրով, իսկ եթե երկու շաբաթվա ընթացքում անհաղթահարելի խոչընդոտը չվերանա, ապա ընտրությունները կհետաձգվեն 40 օրով: |
