ՔԻՄԻԱԿԱՆ ԱՐԴՅՈՒՆԱԲԵՐՈՒԹՅՈՒՆԸ ԿԱ ԵՎ ԱՇԽԱՏՈՒՄ Է ԱՐԱ ՄԱՐՏԻՐՈՍՅԱՆ Ցուցահանդես Հայաստանի պետական ճարտարագիտական համալսարանում Հայաստանի քիմիական արդյունաբերության ձեռնարկությունների արտադրանքի ցուցահանդեսը երեկ բացվեց Հայաստանի պետական ճարտարագիտական համալսարանում: Այն իր բնույթով նորություն էր, քանի որ մինչ այժմ կազմակերպվող ցուցահանդեսները ներկայացնում էին Հայաստանի տնտեսության այլ ոլորտները: Մինդեռ այս անգամ ճարտարագիտական համալսարանի շենքում ներկայացված էին քիմիական, այդ թվումՙ դեղագործական, հին ու նոր մոտ 50 ընկերություններ` ոլորտի ամենահայտնի ձեռնարկություն «Նաիրիտը», կենցաղային քիմիայի գործարանը, «Լիզինը», մարտկոցների արտադրության «Էլբատ» գործարանը, ապակյա տարաների արտադրության «Սարանիստը», ֆիլտրող նյութեր արտադրող «Դիատոմիտը», դեղերի արտադրության «Արփիմեդ», «Լիկվոր», «Վիտամաքս», «Բիոթերմ» ընկերությունները եւ ուրիշներ: Ցուցահանդեսի նպատակն էր իրազեկել հանրությանը այս ճյուղի գործունեության մասին, ծանոթացնել թողարկվող արտադրանքին եւ ոլորտի զարգացումներին: Այս ամենի մասին լրագրողների հետ զրույցում առավել մանրամասն ասաց համալսարանի ռեկտոր Արա Ավետիսյանը : Նրա հավաստիացմամբՙ ցուցահանդեսը կօգնի ոչ միայն քիմիական արդյունաբերությանը, այլեւ այն մասնագետներին, ովքեր ցանկանում են աշխատել այս ճյուղի ձեռնարկություններում: Ռեկտորը տեղեկացրեց, որ տարեկան 70 մասնագետներ են ավարտում ճարտարագիտական համալսարանը` բակալավրեր եւ մագիստրոսներ: «Հասարակության մեջ տարածված է, որ մեր քիմիական արդյունաբերությունը չի գործում, մեր նպատակն է ցույց տալ, որ այս ոլորտը կա եւ աշխատում է», ասաց Արա Ավետիսյանը: Նա նաեւ տեղեկացրեց, որ եկող տարվանից կգործի համալսարանի կայքը, որտեղ ոլորտի աշխատանք փնտրող մասնագետները կգտնեն գործատուներին: Առաջիկայում նախատեսվում է նաեւ այլ ոլորտների ընկերությունների արտադրանքը ներկայացնող ցուցահանդեսներ կազմակերպել` տեղեկատվական տեխնոլոգիաներ, էներգետիկա, էլեկտրատեխնիկա եւ այլն: |
