ԿԱՌԼՍԵՆԸ ՍՏԱՆՁՆԵՑ ԱՌԱՋԱՏԱՐԻ ԴԵՐԸ Լոնդոնում ընթացող շախմատի աշխարհի չեմպիոնի տիտղոսի հավակնորդների մրցաշարի 6-րդ տուրում ուշադրության կենտրոնում էր Լեւոն Արոնյանի - ադրբեջանցի Թեյմուր Ռաջաբովի մրցավեճը: Երկու շախմատիստներն էլ նախօրեին դժվարին մրցախաղեր էին անցկացրել ու գրեթե 6-ժամյա համառ պայքարից հետո հաշտություն էին կնքել մրցակիցների հետ: Բացառություն չկազմեց նաեւ մրցակիցների անձնական հանդիպումը, որն ավելի երկարատեւ էր: Թերթի համարը տպագրության ուղարկելու պահին պարտիան դեռ շարունակվում էր: Չէր ավարտվել նաեւ Գրիշչուկի եւ Գելֆանդի մրցավեճը: 6-րդ տուրից հետո մրցաշարի միանձնյա առաջատարի դերը ստանձնեց նորվեգացի գրոսմայստեր Մագնուս Կառլսենը, որը սեւերով 36-րդ քայլին հաղթելով Պյոտր Սվիդլերին, վաստակեց 4,5 միավոր: 3 միավոր ունեցող Սվիդլերն առաջին պարտությունը կրեց: Կրամնիկն ու Իվանչուկը հաշտություն կնքեցին: Մրցաշարի առաջին շրջանի ավարտական` 7-րդ տուրից առաջ շախմատիստներին այսօր հերթական հանգստյան օրն է տրամադրվել: Իսկ վաղը կկայանան Արոնյան-Գրիշչուկ, Կառլսեն-Ռաջաբով, Գելֆանդ-Կրամնիկ եւ Իվանչուկ-Սվիդլեր պարտիաները: Հ.Գ. Ուղիղ կեսգիշերին Լեւոն Արոնյանը հաղթեց Թեյմուր Ռաջաբովին եւ շորունակում է կիսել առաջատարի դիրքը Կառլսենի հետ։ | 
