ՍԱԼԵՄԻ ՀԱՅԿԱԿԱՆ ԵԿԵՂԵՑԻՆ 100 ՏԱՐԵԿԱՆ Է ԵՎ ՈՒՆԻ ՆՈՐ ՀՈԳԵՎՈՐ ՀՈՎԻՎ Հ. Ծ. Նյու Հեմփշիրի Սալեմ փողոցում գտնվող հայկական «Արարատ միաբանության» եկեղեցին իր հիմնադրման 100-ամյակն է նշել նոյեմբերին իր շարքերում ընդունելով նոր հոգեւոր հովիվՙ պաստոր Սեմ Քաջիկյանին, որն ընտանիքի հետ վերջերս է տեղափոխվել այնտեղ Կանադայից: Ըստ «Արմինյն Միրոր-Սփեքթեյթր» շաբաթաթերթի հաղորդագրությանՙ 1800-ականների վերջերին եւ 1900-ականների սկզբներին որոշակի թվով հայեր հաստատվել են Սալեմում եւ զգալով, որ մինչեւ Լոուրենս (Մասաչուսեթս) հասնելը հավատացյալների համար դժվարություն է ստեղծում, 1912 թվի հոկտեմբերին մի հանձնախումբ են կազմել, որն զբաղվել է տեղում եկեղեցի կառուցելու գործով: Հյուսիսարեւելյան փողոցի երկաթուղային ընկերությունը հողատարածք է հատկացրել, իսկ «Քրիստոսի միացյալ եկեղեցական կոնֆերանսը» (ՔՄԵԿ)ՙ ֆինանսական օժանդակություն ցուցաբերել: Կառուցումը սկսվել է 1913-ի հուլիսին, եւ եկեղեցին օծվել է նույն թվի նոյեմբերի 12-ին: Եկեղեցու այսօրվա հավատացյալներից շատերը նախկին 19 սկզբնավորողների հետնորդներն են: Հարյուր տարվա ընթացքում շատ բան է փոխվել: Նախկին ագարակների փոխարեն վեր են խոյացել արդիական առեւտրի կենտրոններ: Լոուրենսի եւ Սալեմի եկեղեցիները միաձուլվել են իրար, եւ արարողությունն էլ հայերենից անգլերենի է վերածվել: Սակայն եկեղեցին դեռեւս մնում է որպես համախմբող օջախ: Նոր հոգեւոր հովվի առաջին պատարագին ներկա են գտնվել ՔՄԵԿ-ի Հյուսիսային Ամերիկայի Հայկական ավետարանական միության եւ Հայկական միսիոներական ընկերության ներկայացուցիչները: Արարողությունից հետո «Տուսկան» ռեստորանում ճաշկերույթ է տեղի ունեցել, որի ընթացքում հյուրերը ըմբոշխնել են Բոստոնի «Քեֆ» համույթի երաժշտական համարները: Սառա Գիլմանը ներկայացրել է Արարատ եկեղեցու հարյուրամյա պատմությունը, իսկ Սալեմի ավագ դպրոցի ուսանող Ջեկ Բրունելը ցուցադրել է էկրանի վրա ավելի քան 500 լուսանկարներ եկեղեցու հետ կապված նշանակալի իրադարձությունների մասին: Նյու Հեմփշիրի կառավարիչ Մեգի Հասանը հավաստագիր է ստորագրել, որով ճանաչել է եկեղեցու կատարած դրական դերը համայնքում: | 
