ԽՄԵԼՈՒ ՋՈՒՐ` ԱՐԾՎԱԲԵՐԴԻՆ Ադրբեջանի հետ 34 կմ սահման ունեցող Արծվաբերդ գյուղում այս օրերին աշխատանքային եռուզեռ է: Իրականացվում է ջրամատակարարման ենթակառուցվածքի զարգացման ծրագիր, որի մասին ընթացիկ տարվա գարնանը հայտարարել են ՎիվաՍել-ՄՏՍ-ը, ԱՄՆ Միջազգային զարգացման գործակալությունը (ԱՄՆ ՄԶԳ) եւ Վայրի բնության եւ մշակութային արժեքների պահպանման հիմնադրամը (FPWC): Ջրի խնդիրն Արծվաբերդում հանգեցրել է կենցաղավարության տարրական պայմանների բացակայության` նպաստելով համայնքից հեռանալու գյուղացիների որոշմանը: Գյուղապետը վստահ է, որ ծրագրի ավարտը թեթեւացնելու է ոչ միայն գյուղացիների, այլեւ իր հոգսը: Վերանորոգվում է շուրջ 16 տարի անգործության մատնված եւ վթարային դարձած պոմպակայանը, որտեղ կտեղադրվի վայրկյանում 4լ ջուր մղելու հնարավորությամբ, էներգախնայող 2 նոր պոմպ: Պոմպակայանում արդեն տեղադրվել են նոր մետաղական դռներ, իսկ հարդարման մնացած աշխատանքներն այժմ ընթացքի մեջ են: Գյուղապետը համոզված է, որ պոմպերը տեղադրելուց, պատուհանների եւ ներքին հարդարման աշխատանքներն ավարտելուց հետո` պոմպակայանը լիարժեք կծառայի իր նպատակին: Ջրամատակարարման ենթակառուցվածքների զարգացման ծրագրով այս գյուղում նախատեսված է նաեւ 5,5կմ ջրագծի կառուցում, ինչպես նաեւ վայրկյանում 4-5լ ջուր սպասարկելու հնարավորություն ընձեռող մեկ այլ` վթարային ջրագծի եւ ջրընդունիչ կայանի վերանորոգում: Այս ուղղությամբ եւս ակտիվ աշխատանքներ են տարվում: Համայնքապետը տեղեկացնում է, որ ամեն ինչ արվում է ծրագիրն օր առաջ ավարտին հասցնելու համար: Հողային աշխատանքներն 90%-ով ավարտված են: Գրեթե ավարտին է մոտենում նաեւ ջրագծերի մոնտաժման աշխատանքը: Բետոնապատվել է նաեւ շուրջ 370տ տարողությամբ օրվա կարգավորիչ ջրամբարը (ՕԿՋ-ն), որը, մասնագետների գնահատմամբ, կարող է ընդունել 2 ջրագծով մատակարարվող ջրաքանակն ամբողջությամբ եւ այնտեղից 24 ժամ ջուր մատակարարել գյուղացիներին: Առաջիկայում կցանկապատվեն սանիտարական բոլոր գոտիների տարածքները, կտեղադրվեն ջրաչափեր, որոնք կնպաստեն ջրի տնտեսմանն ու հաշվառմանը, կկատարվեն մասնակի այլ աշխատանքներ եւ արծվաբերդցիները կազատվեն սակավաջուր աղբյուրից ջուր կրելու հոգսից: Մեկընդմիշտ կմոռացվի նաեւ կենցաղում տարբեր նպատակներով կիրառելու համար` անձրեւաջուր հավաքելու սովորությունը: Եռակողմ համաձայնագրի շրջանակներում իրականացվող ծրագրի արդյունքում խմելու ջրի խնդիրը լուծում կստանա Արմավիրի մարզիՙ Լուկաշին, Արազափ եւ Տավուշի մարզիՙ Բերքաբեր եւ Արծվաբերդ գյուղերում: ՎիվաՍել-ՄՏՍ-ը, ԱՄՆ Միջազգային զարգացման գործակալությունը եւ Վայրի բնության եւ մշակութային արժեքների պահպանման հիմնադրամն այս ուղղությամբ միավորել են ջանքերը եւ հետեւում են իրականացվող աշխատանքների ընթացքին: Ծրագրի արդյունքից օգտվելու է նշված չորս գյուղի մոտ 6800 բնակիչ: Այդ նպատակով ՎիվաՍել-ՄՏՍ-ը տրամադրել է 70 միլիոն, իսկ ԱՄՆ ՄԶԳ-նՙ 60 միլիոն դրամ: | 
