ՀՐԱԺԵՇՏ ԴԵՍՊԱՆ ՏԻԳՐԱՆ ՍԱՐԳՍՅԱՆԻՆ Այս վերնագրով Վաշինգտոնից ստացված հաղորդագրությունից տեղեկանում ենք, որ հունվարի 14-ին Մ. Նահանգների մայրաքաղաքի Ս. Աստվածածին եկեղեցու ծխական խորհրդի եւ հոգեւոր հովիվ Տեր Հովսեփ քհն. Կարապետյանի հյուրընկալությամբ հրաժեշտի հանդիպում է կազմակերպվել ի պատիվ Մ. Նահանգներում ՀՀ դեսպան Տիգրան Սարգսյանիՙ Վաշինգտոնից նրա մեկնելու եւ Մոսկվայում Եվրասիական տնտեսական հանձնաժողովի կոլեգիայի նախագահի պաշտոնն ստանձնելու կապակցությամբ: Հրաժեշտի ընդունելությունը վայելում էր Արեւելյան թեմի առաջնորդ գերշ. Խաժակ արք. Պարսամյանի հովանավորությունը: Սրբազանն իր ելույթում ընդգծել է պրն Տ. Սարգսյանի իրագործումների կարեւորությունը ՀՀ կենտրոնական դրամատան նախագահի, ՀՀ վարչապետի եւ ՀՀ դեսպանի պաշտոններում, չմոռանալով գնահատել նրա դերը նաեւ Արարատյան հայրապետական թեմի խորհրդի նախագահի պաշտոնում: Հրաժեշտի խոսք են ասել Ամերիկայի հայկական համագումարի վարչության անդամ Անի Թոթանը, Ռիտա Պալյանը եւ Տեր Հովսեփը: Ձեռնարկին մասնակցել են նաեւ գաղթօջախի տարբեր կազմակերպությունների ներկայացուցիչներ, որոնց թվումՙ ՌԱԿ Մ. Նահանգների Արեւելյան շրջանի վարչության անդամ Գեւորգ Մարաշլյանը եւ Հայաստանից ՌԱԿ Հանրապետական վարչության անդամ Վարազդատ Ավոյանը: Ռամկավար գործիչները նորանոր հաջողություններ են մաղթել Տ. Սարգսյանին: Հիշեցնենք, որ փետրվարի 1-ից ԱՄՆ-ում Հայաստանի դեսպանի պաշտոնն ստանձնելու է Գրիգոր Հովհաննիսյանը: Նկար 1. Ձախից աջՙ Գեւորգ Մարաշլյան, Տիգրան Սարգսյան իր կրտսեր որդուՙ Մարկոսի հետ, Արմեն Սարգսյանՙ Չինաստանում ՀՀ դեսպան, եւ Վարազդատ Ավոյան: | 
