ԱԴՐԲԵՋԱՆԻ ՀԵՐԹԱԿԱՆ ՀԻՍՏԵՐԻԱՆ, ԱՅՍ ԱՆԳԱՄ ՄԻԼԱՆԻ ՄԻՋԱԶԳԱՅԻՆ ՏՈՒՐԻԶՄԻ ՑՈՒՑԱՀԱՆԴԵՍՈՒՄ Փետրվարի 14-17-ը Իտալիայի Միլան քաղաքում տեղի ունեցավ Միջազգային տուրիզմի հերթական ցուցահանդեսը: Եվ այս տարի, առաջին անգամ, Լեռնային Ղարաբաղի Հանրապետությունը ներկայանում էր Հայաստանից զատՙ ցուցադրելով գրքեր, հոլովակներ, գինի, կոնյակ եւ այլ նյութեր: Լեռնային Ղարաբաղի պատվիրակությունը բաղկացած էր 4 անդամներիցՙ Պատմական միջավայրի պահպանության եւ կառավարության զբոսաշրջության բաժնի տնօրեն Սերգեյ Շահվերդյանի գլխավորությամբ: Ադրբեջանի տաղավարը գտնվում էր Լեռնային Ղարաբաղի Հանրապետությունը ներկայացնող տաղավարի համարյա հարեւանությամբ: Ազերիները այս անգամ էլ սեփական պարտությունը «արդարացնելու» համար ընկան ինքնախաբեության գիրկը` չկարողանալով անտեսել այն փաստը, որ Լեռնային Ղարաբաղն իր առանձին տաղավարն ունի եւ աշխարհին է ներկայանում որպես ինքնուրույն միավոր: Ցուցահանդեսի սկսվելուց հաշված ժամեր անց Ադրբեջանի ներկայացուցիչներից մեկը մոտենում է ԼՂՀ-ի տաղավարին եւ գոռոզամտորեն հայտարարում, որ Լեռնային Ղարաբաղի Հանրապետության առանձին տաղավար ունենալը չի համապատասխանում միջազգային իրավական նորմերին: Ասկյարը պահանջում է լքել տաղավարը եւ դադարեցնել Արցախի մասին թերթոնների բաժանումը: Չբավարարվելով միայն հայտարարություններով, ազերիները նույն գիշերվա ընթացքում (ամսի 15-ին) ներխուժում են ԼՂՀ-ն ներկայացնող տաղավար, գողանում են գրքույկներ եւ մեծ պաստառը, որի վրա գրված էր «Լեռնային Ղարաբաղ»: Հարցին միջնորդում է Միլանում գործող Հայաստանի Հանրապետության պատվո հյուպատոսարանը: Պատվո հյուպատոս պրն Պիետրո Քուչուկյանը, որը այս ամենի ականատեսն ու վկան էր, պրն Շահվերդյանի հետ դիմում է ցուցահանդեսի մենեջեր Էմանուելա Ֆոռլինինՙ պատմելով կատարվածի մասին եւ խնդրում օգնելՙ կանխելու համար ապագա անախորժությունները: Սակայն պատմությունը այս ամենով չի վերջանում... Հենց հաջորդ օրը անվտանգության գլխավոր պատասխանատուն պրն Քուչուկյանին եւ պրն Շահվերդյանին իր գրասենյակ է հրավիրում, որտեղ նրանց էին սպասում 4 ադրբեջանցիներ, այդ թվումՙ Հռոմից ժամանած Ադրբեջանի նախկին դեսպանը: Ազերիները, առաջ բերելով բազմաթիվ անհեթեթ պատճառաբանություններ, շարունակում են պնդել, թե Լեռնային Ղարաբաղի Հանրապետության տաղավարի առկայությունը իրավական խախտում է: Երկար վիճաբանութունից հետո, երբ անվտանգության գլխավոր պատասխանատուն հասկանում է ադրբեջանական կողմի անհեթեթ պահվածքը, զայրացած դիմում է վերջիններիս նշելով, որ ադրբեջանցիները ճիշտ վայր չեն ընտրել նման քննարկումներ անցկացնելու համար: Ավելին` նման վարքագծի շարունակությունը կարող է հանգեցնել նրան, որ հաջորդ տարվա ցուցահանդեսում ադրբեջանցիները կզրկվեն տաղավար ունենալու հնարավորությունից: Հաջորդ օրը ազերիները, մոռանալով թե ինչի համար են եկել միլանյան ցուցահանդես, իրենց տաղավարում նոր պաստառներ են փակցնում` հետեւյալ մակագրություններով. «1 միլիոն ազերի փախստականներ», «Հայերը ներխուժել են Ղարաբաղ» եւ այլն: Պրն Քուչուկյանը անմիջապես դիմում է Էմանուելա Ֆոռլինին, որը խոստանում է միջամտել: Ցուցահանդեսի փակման օրը Լեռնային Ղարաբաղի Հանրապետության պատվիրակությանը այցելեցին իտալահայ գաղութի մի շարք անդամներՙ Իտալիայի հայոց հոգեւոր հովիվ Թովմա աբեղա Խաչատրյանի գլխավորությամբ: | 
