ՀՐԱՁԻԳՆԵՐՆ ԱՎԱՐՏԵՑԻՆ ՄՐՑԱՎԵՃԸ Դանիայում ավարտվեց հրաձգության Եվրոպայի առաջնությունը: Երիտասարդների տարիքային խմբում վազող թիրախ 10 մ խառը վազք մրցաձեւում բրոնզե մեդալի արժանացած մեր հրաձիգների եռյակը չկարողացավ նույն հաջողությամբ մասնակցել վազող թիրախ նորմալ վազքի մրցումներին: Մեր հավաքականը 1597 միավորով գրավեց 4-րդ տեղըՙ իրենից առաջ թողնելով Ուկրաինայի (1670), Ֆինլանդիայի (1633) եւ Ռուսաստանի (1604) հրաձիգներին: Անհատական պայքարում Ռազմիկ Մինասյանը 543 միավորով 16 մասնակիցների մեջ գրավեց 8-րդ տեղը: Արթուր Պետրոսյանը 531 միավորով 12-րդ տեղում էր, իսկ Շանթ Սարգսյանը 15-րդն էր (523 միավոր): Նույն մրցաձեւի աղջիկների պայքարում Լիլիթ Մկրտչյանը 345 միավորով զբաղեցրեց 9-րդ հորիզոնականը: Մրցումների վերջին օրը մեծահասակների մրցաշարում հանդես եկան Իրինա Աղաջանյանն ու Կարինե Պողոսյանը: Օդամղիչ հրացանով մրցաձեւում Իրինան 404 միավորով 77 մասնակիցների մեջ գրավեց 67-րդ հորիզոնականը, իսկ Կարինեն 394,9 միավորով եզրափակեց աղյուսակը: | 
