«ՄՈԽՐԱԳՈՒՅՆ ԿՈՍՏՅՈՒՄՈՎ ԵՐԻՏԱՍԱՐԴԸ» Հ. Ծ. Հակոբ Հաչիկյանի նոր գիրքը Խմբագրությանը հասցեագրված հաղորդագրությունը տեղեկացնում է, որ «Ինտերլինք» հրատարակչատունը լույս է ընծայել Հակոբ Հաչիկյանի նոր «Մոխրագույն կոստյումով երիտասարդը» (The Young Man in the Gray Suit) խորագրով հատորը, որը շարունակությունն է նրա նախորդՙ միջազգային բեստսելլեր դարձած «Ամառն առանց արշալույսի» (A Summer Without Dawn) վերնագրով բազում լեզուների թարգմանված ավանդավեպի: Հաչիկյանը 1957 թվից ապրում է Քվեբեկում (Կանադա) եւ համալսարանի դասախոս է ու հեղինակ գրական, լեզվաբանական աշխատությունների եւ թարգմանությունների: Իր նոր գրքում նա պատկերում է հայկական սփյուռքում վերանորոգ կյանքով ապրելու եւ համայնական աղետի վերքերն ամոքելու հնարավորությունները: Դեպքերը տեղի են ունենում 1950-ական թվերի կեսերինՙ չորս տասնամյակ անց Հայոց ցեղասպանությունից: Թուրք երիտասարդ մեծահարուստ փաստաբան Նուր Կարդամը իր հոր հանկարծակի մահվան լուրն է ստանում եւ շուտով բացահայտում իր հոր անցյալի հետ կապված որոշ գաղտնիքներ: Նա տեղեկանում է կոռումպացված ընտանեկան «կայսրության», հայերի ցեղասպանությանը հոր մասնակցության եւ իր ծագումով հայ մոր մասին, որին երբեք չի ճանաչել: Ընտանիքի, պատմության եւ քաղաքականության խճճված ցանցում հայտնված Նուրը Նյու Յորք է ճանապարհորդում, որտեղ իր ջանքերըՙ գտնելու մորը եւ պաշտպանելու հոր ժառանգությունը, մղում են նրան վերանայելու սիրո, հավատարմության եւ սխալներ գործելու վերաբերյալ իր դիրքորոշումները: Իր հետաքրքրաշարժ պատմողական ոճով նոր հատորը խոստանում է ունենալ նախորդի հաջողությունը: 320 էջերից բաղկացած գիրքը արժի 20 դոլար: Տեղեկությունների համար այցելել www.interlinkbooks.com կայքը: | 
