ՄԽԻԹԱՐՅԱՆՆ ԱՐԴՅՈՒՆԱՎԵՏՈՒԹՅԱՆ ՆՈՐ ՌԵԿՈՐԴ ՍԱՀՄԱՆԵՑ Ուկրաինայի առաջնության 28-րդ տուրում 2 անգամ գրավելով Սիմֆերոպոլի «Տավրիայի» դարպասը, Հենրիխ Մխիթարյանն իր գոլերի թիվը հասցրեց 24-ի եւ արդյունավետության նոր ռեկորդ սահմանեց: Մինչ այդ Ուկրաինայի առաջնություններում մեկ մրցաշրջանում բոլորից շատ գոլեր (22-ական) էին խփել Կիեւի «Դինամոյի» նախկին ֆուտբոլիստներ Սերգեյ Ռեբրովն (1997/98-ին) ու Մաքսիմ Շացկիխը (2002/03-ին): Առաջնության ավարտին դեռ 2 տուր կա, այնպես որ Մխիթարյանը պետք է փորձի գերազանցել նաեւ «Շախտյորի» արդյունավետության բացարձակ ռեկորդը, որը պատկանում է թիմի հանրահայտ ռմբարկու Վիտալի Ստարուխինին: Վերջինս 1979-ին ԽՍՀՄ առաջնությունում 26 գոլի հեղինակ է դարձել: Հենրիխ Մխիթարյանի գործակալ Մինո Ռայոլան Corriero dello Sport-ի թղթակցին տեղեկացրել է, որ հայ ֆուտբոլիստի տրանսֆերի հարցով բանակցում է Թուրինի «Յուվենտուսի» հետ: Ըստ Ռայոլայի, եթե այդ տեղափոխությունը չկայանա, ապա կդիտարկեն եվրոպական առաջատար այլ ակումբներից ստացված առաջարկությունները: | 
