ՍԻՐԻԱՅԻՆ ՆՎԻՐՎԱԾ ԿՈՆՖԵՐԱՆՍԸ ԿԿԱՅԱՆԱ ՀՈՒԼԻՍԻՆ Արաբական պետությունների լիգայի եւ ՄԱԿ-ի հատուկ բանագնաց Լախդար Բրահիմին հայտարարել է, որ Սիրիային նվիրված հաշտության կոնֆերանսը հունիսին չի կայանա: Միջոցառման կազմակերպիչներն են ԱՄՆ-ը եւ Ռուսաստանը: Բրահիմին ասել է, որ սիրիական ընդդիմությունը եւ պաշտոնական Դամասկոսը դեռ վերջնական համաձայնություն չեն տվել Ժնեւում կայանալիք կոնֆերանսին իրենց մասնակցության առնչությամբ: Այդ պատճառով հանդիպման անցկացումը հետաձգվում է մինչեւ հուլիս, հաղորդում է Ռոյթեր գործակալությունը: Ֆրանսպրեսը իր հերթին մեջբերում է հատված «Ալ Ղաիդայի» առաջնորդ Այման ալ Զաուահիրիի հունիսի 6-ի կոչից, որով նա սիրիացիներին հորդորում է միավորվել նախագահ Բաշար Ասադին տապալելու նպատակով: Զաուահիրին մասնավորապես պնդում է, թե ԱՄՆ-ը մտադրվել է Սիրիայում ամերիկամետ վարչակարգ հաստատել հանուն Իսրայելի շահերի պաշտպանության: Իսրայելի պետության ստեղծման 65-ամյակի առթիվ հունիսի 6-ին իսլամիստական կայքերում տարածվել է Զաուահիրիի ելույթի 22-րոպեանոց ձայնագրությունը, որտեղ նա «Լեւանտի առյուծներին» կոչ է անում միավորվել Ասադի տապալման «դրվատելի նպատակի շուրջը» եւ «վեր կանգնել դավանանքային պատկանելություններից»: | 
