ՑՈՒՑԱՀԱՆԴԵՍ` ՆՎԻՐՎԱԾ ԱՐԱ ԲԵՔԱՐՅԱՆԻ ԾՆՆԴՅԱՆ 100-ԱՄՅԱԿԻՆ Հայաստանի ազգային պատկերասրահում վաղըՙ օգոստոսի 23-ին, ժամը 15:00-ին, կբացվի հոբելյանական ցուցահանդես նվիրված ՀԽՍՀ ժողովրդական նկարիչ, պրոֆեսոր Արա Բեքարյանի ծննդյան 100-ամյակին: Նույն օրը տեղի կունենա նաեւ նկարչի աշխատանքների ծավալուն պատկերագրքի շնորհանդեսը: Ցուցահանդեսում կներկայացվեն արվեստագետի գեղանկարչական եւ գրաֆիկական աշխատանքները, որոնց մի մասը ընտանիքի սեփականությունն է եւ ցուցադրվում է առաջին անգամ: Բեքարյանի բնանկարներում եւ նատյուրմորտներում առանձնահատուկ տեղ ունի գյուղական կյանքը պարզ ու ընդհանրացված, զերծ կենցաղային, ազգագրական շեշտադրումներից: Դիմանկարներում ներկայացված են մարդկային զանազան ապրումներ նկարչի մտերիմների մարմնավորմամբ: Նշենք, որ Արա Բեքարյանը ծնվել է 1913 թ. հունիսի 12-ին Աֆիոն-Կարահիսարում (Թուրքիա): 1925 թվականին ընտանիքի հետ Ֆրանսիայից հայրենադարձվել է Խորհրդային Հայաստան: 1932 թ. ավարտել է Երեւանի գեղարվեստաարդյունաբերական տեխնիկումը, 1939 թ. Լենինգրադի համառուսական գեղարվեստի ակադեմիան: Մասնակցել է Հայրենական մեծ պատերազմին: 1945-1986 թթ դասավանդել է Երեւանի պետական գեղարվեստաթատերական ինստիտուտում, 1947-1950 թթ Երեւանի Փանոս Թերլեմեզյանի անվան գեղարվեստի ուսումնարանում: Արա Բեքարյանի աշխատանքները ցուցադրվել են արտասահմանյան բազմաթիվ երկրներում` Ռուսաստանում, Լիբանանում, Կանադայում, Բելգիայում, Ֆրանսիայում, Բուլղարիայում, Ռումինիայում, Հունգարիայում, Վիետնամում, Կորեայում, Գանայում, Լեհաստանում, Հարավսլավիայում, Չեխոսլովակիայում, Իրանում, Ճապոնիայում, Մոնղոլիայում, Շրի Լանկայում: Իսկ անհատական ցուցահանդեսներով հանդես է եկել Երեւանում (1947թ., 1963թ.), Մոսկվայում (1964թ.), Լվովում, Լուբնինում (1980թ.), Զագրեբում: Ցուցահանդեսն իրականացվում է մշակույթի նախարարության աջակցությամբ: |
