ԿՈՐՅՈՒՆ ԱՄԻՐՅԱՆՆ ԱՌԱՋԻՆ ՄԵԴԱԼԸ ՊԱՐԳԵՎԵՑ ՀԱՅԱՍՏԱՆԻՆ Սերբիայում մեկնարկած հունահռոմեական ըմբշամարտի աշխարհի պատանեկան առաջնության առաջին օրը մրցագորգ դուրս եկած հայաստանցի 5 ըմբիշներից միայն Կորյուն Ամիրյանին հաջողվեց մրցանակակիր դառնալՙ արժանանալով բրոնզե մեդալի: Կորյունը մինչեւ 63 կգ քաշայինների մրցավեճում հաջորդաբար հաղթելով եգիպտացի Իբրահիմ Ահմեդին, ուկրաինացի Վալենտին Լոզինսկուն եւ վրացի Մինդիա Բոլկվաձեին, մտավ կիսաեզրափակիչ: Այս փուլում հայ ըմբիշը պարտվեց ռուսաստանցի Ազամատ Տախոեւին, որն ի վերջո նվաճեց աշխարհի չեմպիոնի տիտղոսըՙ վճռորոշ գոտեմարտում հաղթելով լիտվացի Պաուլիուս Գալկինասին: Կորյուն Ամիրյանն իրավունք ստացավ վիճարկելու բրոնզե մեդալը: Այդ պայքարում նա հաղթեց Ղրղզստանի ներկայացուցիչ Ադիլետ Տոկտոբեկովին ու դարձավ մրցանակակիր: Մինչեւ 50 կգ քաշային կարգում Նորայր Հախոյանը հաղթելով ռումինացի Էմանուել Պալ Գլաուդիուին, հաջորդ գոտեմարտում զիջեց ղազախ Այդոս Սուլթանգալիին եւ դուրս մնաց հետագա պայքարից: Նույնպիսի ճակատագրի արժանացավ Մասիս Թամազյանը (54 կգ), որը մեկնարկում հաղթելով ադրբեջանցի Նիյազի Մամադովին, հաջորդ փուլում պարտվեց իրանցի Մոհամադ Մովադելիասիին: Նույնպիսի սցենարով անցան մինչեւ 58 կգ քաշային կարգում գոտեմարտի բռնված Արման Մելիքյանի հանդիպումները: Առաջին գոտեմարտում հաղթելով խորվաթ Ալեն Ֆոդորին, Արմանը հաջորդ փուլում պարտվեց վրացի Լեւանի Կավյարաձեին ու դուրս մնաց հետագա պայքարից: Մինչեւ 100 կգ քաշայինների մրցումներում էլ Էդգար Խաչատրյանը հաղթելով իրանցի Ամիրհուսեին Հուսեինին, հաջորդ գոտեմարտերում պարտվեց ադրբեջանցի Ադամբեկ Սիդիկովին: | 
