ԳԵՎՈՐԳ ՂԱԶԱՐՅԱՆՆ ՈՒ ԽԱՂԸՆԿԵՐՆԵՐԸ ՄԵԾ ԱՆԱԿՆԿԱԼ ՄԱՏՈՒՑԵՑԻՆ Ղազախստանի չեմպիոն Կարագանդայի «Շախտյորը», որի կազմում հանդես է գալիս Հայաստանի ազգային հավաքականի հարձակվող Գեւորգ Ղազարյանը, մոտ է իր պատմության մեջ առաջին անգամ չեմպիոնների լիգայի խմբային մրցաշարի ուղեգիր նվաճելուն: Չեմպիոնների լիգայի որակավորման 4-րդ փուլի առաջին խաղում «Շախտյորը» սեփական հարկի տակ մեծ անակնկալ մատուցեցՙ 2-0 հաշվով պարտության մատնելով եվրոպական ֆուտբոլի առաջատար ակումբներից մեկինՙ շոտլանդական «Սելթիկին»: Թիմի հաղթանակն ապահովեցին Անդրեյ Ֆենոնչենկոյի եւ Սերգեյ Խիժնիչենկոյի խփած գոլերը: Գեւորգ Ղազարյանը մասնակցեց ողջ հանդիպմանը: Նա Հենրիխ Մխիթարյանից հետո կարող է դառնալ 2-րդ հայ ֆուտբոլիստը, որը հանդես կգա չեմպիոնների լիգայի խմբային մրցաշարում: Դրա համար «Շախտյորին» անհրաժեշտ է պատասխան խաղում պահպանել առավելությունը: Սակայն եթե նույնիսկ «Շախտյորին» չհաջողվի չեմպիոնների լիգայի խմբային մրցաշարի ուղեգիր նվաճել, թիմը հանդես կգա Եվրոպայի լիգայի խմբային մրցաշարում: Սա եւս ղազախական թիմի համար մեծ նվաճում է: Կարելի է վստահորեն նշել, որ Սանկտ Պետերբուրգի «Զենիթն» արդեն նվաճել է չեմպիոնների լիգայի խմբային մրցաշարի ուղեգիրըՙ հյուրընկալվելիս 4-1 հաշվով ջախջախելով պորտուգալական «Պասուշ դե Ֆեռեյրային»: «Զենիթի» կազմում արդյունավետությամբ աչքի ընկավ Ռոման Շիրոկովըՙ դառնալով հեթ տրիկի հեղինակ: Սեփական հարկի տակ անսպասելիորեն պարտություն կրեց ֆրանսիական «Լիոնը»ՙ 0-2 հաշվով զիջելով իսպանական «Ռեալ Սոսյեդադին»: Էյնդհովենում տեղի համանուն թիմի եւ իտալական «Միլանի» մրցավեճում գրանցվեց ոչ-ոքիՙ 1-1: | 
