ՀԱՅԵՐԻՑ ԼԱՎԱԳՈՒՅՆԸ ԿԱՐԵՆ ԳՐԻԳՈՐՅԱՆԻ ԱՐԴՅՈՒՆՔՆ Է Շախմատի Եվրոպայի պատանեկան առաջնությունում կայացած 7 տուրերից հետո հայ շախմատիստներից լավագույնը Կարեն Գրիգորյանի արդյունքն է, որը մինչեւ 18 տարեկանների մրցաշարում 6 միավորով Վլադիմիր Ֆեդոսեեւի եւ Իրակլի Բերաձեի հետ գլխավորում է աղյուսակը: Կարենը վերջին 3 տուրերում հաղթանակներ տոնեց Հովհաննես Գաբուզյանի, Նոել Ստուդերի եւ Դարսեն Սանժաեւի նկատմամբ: Գրիգորյանը պարտություն չի կրելՙ միայն 2 պարտիա ավարտելով ոչ-ոքի: Տարիքային այս խմբում հանդես եկող Արման Միքայելյանն ունի 5 միավոր, 5,5 միավոր է վաստակել Հովհաննես Գաբուզյանը: Մինչեւ 10 տարեկանների մրցաշարի առաջատար Արմեն Բարսեղյանը 6-րդ տուրում առաջին պարտությունը կրեցՙ զիջելով Արսենի Նեստերովին: Հաջորդ տուրում Արմենը հաղթեց Եգե Կարահմեթօղլուն եւ վաստակած 5,5 միավորով ընթանում է 5-րդ տեղում: Նա ընդամենը կես միավոր է զիջում առաջատարներինՙ Արսենի Նեստերովին եւ Կագան Այդինկելեբիին: Տարիքային այս խմբում 4,5-ական միավոր են վաստակել Գոռ Մելքոնյանն ու Հակոբ Հակոբյանը, 4 միավոր ունի Ալեքս Մանուկյանը: Մինչեւ 12 տարեկանների մրցաշարում Արամ Հակոբյանը 5 միավորով 13-րդ տեղում է: Այստեղ 6-ական միավորով առաջատարներն են Անդրեյ Եսիպենկոն, Վիկտոր Մատվիշեն եւ Նգուեն Վանը: Վերջին 2 տուրերն անհաջող դասավորվեցին մինչեւ 16 տարեկանների մրցաշարի առաջատարներից մեկիՙ Տիգրան Հարությունյանի համար, որը մինչ այդ անպարտելի էր: Նա պարտվեց Կիրիլ Ալեքսեենկոյին եւ Ռամիլ Ֆայզբախմանովին եւ 4,5 միավորով նահանջեց 13-րդ հորիզոնական: Նույնքան միավոր ունի նաեւ Կարեն Հովհաննիսյանը: Հայ շախմատիստուհիներից լավագույն արդյունքն ունեն Մանե Ադամյանն ու Անի Հարությունյանը, որոնք վաստակել են 4,5-ական միավոր: Մանեն հաղթեց Անդրեա Լենգուելին ու պարտվեց Անաստասիա Կոզինային: Նա մինչեւ 12 տարեկանների մրցաշարում 16-րդ տեղում է: Անին մինչեւ 16 տարեկանների մրցաշարում 12-րդ տեղում է: Նա նախ հաղթեց Ելիզավետ Պարատանասիոյին, ապա առաջին պարտությունը կրեց Զալինա Լինգուրի հետ մրցավեճում: | 
