ՍԻՐԻԱՅԻ ՔԻՄԻԱԿԱՆ ԶԵՆՔԻ ՈՉՆՉԱՑՈՒՄՆ ՍԿՍՎԵԼ Է Սիրիացի մասնագետները Քիմիական զենքի արգելման կազմակերպության փորձագետների վերահսկողության ներքո կիրակի օրվանից սկսել են Սիրիայի քիմիական զինանոցների ոչնչացումը: Այդ մասին հաղորդում է ՌԻԱ գործակալությունը, վկայակոչելով ՄԱԿ-ի մամլո ծառայությունը: «Գազային հատիչներ եւ անկյունային հղկիչ մեքենաներ օգտագործելովՙ սիրիացի մասնագետները ոչնչացրին եւ ապաակտիվացրին զինամթերքի մի մասը, այդ թվումՙ մարտագլխիկներ, ավիառումբեր, ինչպես նաեւ միախառնման ու լցոնման սարքավորումներ», ասվում է ՄԱԿ-ի տարածած պաշտոնական հայտարարության մեջ: Միջազգային փորձագետների խումբը Սիրիայում է հոկտեմբերի 1-ից: Նախագահ Բաշար Ասադը ավելի վաղ հայտարարել էր, որ Սիրիայի քիմիական զենքի պաշարների ոչնչացման ծախսերը կկազմեն մոտավորապես 1 մլրդ դոլար: Նախատեսվում է քիմիական զինանոցների ոչնչացման աշխատանքներն ավարտել մինչեւ 2014-ի կեսերը: Դրանք կֆինանսավորեն ուրիշ երկրներ, ինչպես նաեւ միջազգային կազմակերպություններ: Ռուսաստանի արտգործնախարար Սերգեյ Լավրովը եւ ԱՄՆ-ի պետքարտուղար Ջոն Քերրին հոկտեմբերի 7-ին Ասիա-խաղաղօվկիանոսյան տնտեսական համագործակցության կազմակերպության համաժողովում գոհունակություն են արտահայտել զինանոցների ոչնչացման աշխատանքների հաջող ընթացքի կապակցությամբ: Քերրին նաեւ ասել է, որ Ժնեւում Սիրիային նվիրված երկրորդ խորհրդաժողովի անցկացման ժամկետը պետք է որոշվի ՄԱԿ-ում, բայց ինքը հույս ունի, որ այդ միջոցառումը տեղի կունենա նոյեմբերին: | 
