ՆՈՐ ՎԱՐՉԱՊԵՏԻ ՆՇԱՆԱԿՄԱՆ ՀԱՐՑ ՀՀԿ-Ն ԴԵՌ ՉԻ ՔՆՆԱՐԿԵԼ ԵՐԵՎԱՆ, 6 ՓԵՏՐՎԱՐԻ, ԱՐՄԵՆՊՐԵՍ: Հայաստանի Հանրապետական կուսակցությունն առաջիկա նախագահական ընտրություններից հետո ձեւավորվելիք նոր կառավարության ղեկավարի` ՀՀ վարչապետի հարցը դեռեւս չի քննարկել: «Արմենպրես»-ի հաղորդմամբ` Ազգային ժողովում լրագրողների հետ զրույցում ՀՀ վարչապետ Տիգրան Սարգսյանը լրագրողներին առաջարկեց զինվել համբերությամբ, սպասել ընտրությունների արդյունքներին: «Կարծում եմ` 5 տարի դիմացել եք, մի քանի ամիս էլ կդիմանաք», ասաց ՀՀ վարչապետը: Անդրադառնալով «Բարգավաճ Հայաստան»-ի եւ ՀՅԴ-ի հետ նոր կոալիցիայի ձեւավորման հավանականության մասին հարցին` Տիգրան Սարգսյանը նշեց, որ ՀՀԿ-ն մշտապես ձգտում է ստեղծել համագործակցության միջավայր երկրի առջեւ ծառացած խնդիրները լուծելու համար: «Այդ հիմքով էլ կոալիցիա էր ձեւավորվել, սակայն մեր գործընկերների մի մասն իրենց որոշմամբ դուրս եկան կոալիցիայից: Եթե մեր գործընկերները կայացնեն կոալիցիա կազմելու որոշում` հարցը կքննարկվի, բայց այդպիսի որոշում դեռ չկա», ասաց ՀՀ վարչապետը: | 
