ԱՆՈՒՇ ՀՈՎՀԱՆՆԻՍՅԱՆԸ «ՔՈՎԵՆՏ ԳԱՐԴԵՆՈՒՄ» Հ. Ծ. Ինչպես «Ազգը» նախապես տեղեկացրել էր, Լոնդոնի Օպերայի արքայական թատրոնը հայտարարել է պաշտոնապես, որ առաջիկա սեպտեմբերին միանալու է «Ջետտի Պարկեր երիտասարդ արվեստագետների ծրագրին» 50 երկրներից 365-ից ավելի դիմորդներից ընտրելով ընդամենը հինգ երգիչ-կատարողների, որոնց թվում են հայազգի սոպրանո Անուշ Հովհաննիսյանը, ավստրալացի սոպրանո Կիանդրա Հովարտը, ռուս մեցցո-սոպրանո Նադեժդա Կարիազինան, իռլանդացի մեցցո-սոպրանո Ռեյչոլ Քելլին եւ պորտուգալացի տենոր Լուիս Գոմեսը: Հովհաննիսյանը ներկայիս սովորում է Շոտլանդիայի արքայական երաժշտանոցում: Վերոնշյալ ծրագիրը նպատակ է հետապնդում աջակցելու երիտասարդ երգիչ-երգչուհիների, դիրիժորների եւ գեղարվեստական ղեկավարների պրոֆեսիոնալ մակարդակի բարձրացմանը, առանց տարիքային սահմանափակումների: Միացյալ Թագավորությունում Հովհաննիսյանի կեցությունը հովանավորում են «ABRSM» միջազգային կրթաթոշակային հիմնադրամը, «RCS» տրաստը, ՀԲԸՄ-ն եւ Կյուզելյան ընտանիքը: Անուշը վարպետության դասեր է վերցրել Ջեյն Իգլենից, Լայզա Միլնից, Մալկոլմ Մարտինոյից, Միշել Կրիդերից եւ Մոնսերատ Կաբալյեից: Հանդես եկել «Անտառապահի կինը», «Փոքրիկ խորամանկ Վիքսենը», «Կլարայի նշանդրեքը մենաստանում», «Միջամառային գիշերվա երազը» եւ այլ օպերաներում: Արժանացել է բազմաթիվ մրցանակների: |
