ՈՉ-ՈՔԻ ԵՐԿԱՐԱՏԵՎ ՊԱՅՔԱՐԻՑ ՀԵՏՈ Երեկ Լոնդոնում ընթացող հավակնորդների մրցաշարում կայացան 5-րդ տուրի հանդիպումները, որոնք աչքի ընկան պայքարի լարվածությամբ: Բավական է նշել, որ 4-ժամյա պայքարից հետո դեռեւս ոչ մի պարտիա չէր ավարտվել: Նույնիսկ Լեւոն Արոնյանը, որը սովորաբար շատ արագ է խաղում, Վլադիմիր Կրամնիկի հետ մրցավեճում սեւ խաղաքարերով դեռ շարունակում էր պայքարը: Ի դեպ, ռուս գրոսմայստերը նախորդ տուրում բավականին երկարատեւ պայքարից հետո հաշտություն էր կնքել Թեյմուր Ռաջաբովի հետ ու վաստակել էր 2 միավոր: Այնպես որ 5-րդ տուրում հաղթանակի դեպքում Կրամնիկը կարող էր միավորներով հավասարվել Արոնյանին: Երկարատեւ պայքարից հետո մրցակիցները խաղաղ դաշն կնքեցին: Առաջինն ավարտված Սվիդլերի եւ Գելֆանդի մրցավեճում ոչ-ոքի գրանցվեց: Նույնպիսի ելք ունեցավ Իվանչուկ-Կառլսեն պարտիան: Գրիշչուկ-Ռաջաբով պարտիան թերթի համարը տպագրության ուղարկելու պահին դեռ շարունակվում էր: Արոնյանն ու Կառլսենը 3,5-ական միավորով շարունակում են գլխավորել աղյուսակը: Այսօր կայանալիք 6-րդ տուրում Արոնյանը սեւերով կխաղա Ռաջաբովի հետ: Կառլսենի մրցակիցը կլինի Սվիդլերը: | 
