Տեղադրվել է` 2013-03-21 00:20:21 (GMT +04:00)

Ընթերցված է` 1882, Տպվել է` 93, Ուղարկվել է էլ.փոստով` 92

ՄԵՐ ԲՌՆՑՔԱՄԱՐՏԻԿՆԵՐԻ ՀԱՋՈՂ ՄՐՑԵԼՈՒՅԹՆԵՐԸ ՉԵԽԻԱՅՈՒՄ

Չեխիայի Ուսցի Նա Լաբե քաղաքում անցկացված բռնցքամարտի Ա կարգի միջազգային մրցաշարում Հայաստանը ներկայացրած 5 բռնցքամարտիկներից 3-ը դարձան մրցանակակիր:

Առավել հաջող հանդես եկավ ծանրքաշային Արմեն Սիմոնյանը, որը հաղթելով իր բոլոր մրցակիցներին, մտավ եզրափակիչ: Այստեղ նա բավական արժանի դիմադրություն ցույց տվեց Ղազախստանի ներկայացուցիչ, Լոնդոնի օլիմպիադայի մրցանակակիր Իվան Դիժկոյին: Սակայն հայ բռնցքամարտիկին չհաջողվեց հաղթելՙ բավարարվելով արծաթե մեդալով:

Մեր մյուս 2 բռնցքամարտիկներըՙ 52 կգ քաշային Նարեկ Աբգարյանը եւ 64 կգ քաշայինների մրցավեճին մասնակցած Արա Պուլուզյանը դարձան բրոնզե մեդալակիրներ:

Մարտի 25-29 ՀՀ հավաքականի մյուս անդամներից բաղկացած խումբը հանդես կգա Ուկրաինայում կայանալիք մրցաշարում: Մյուսներն էլ մրցավեճի կբռնվեն մարտի 29-ից ապրիլի 4-ը Ղազախստանում կայանալիք մրցաշարում: 3 մրցաշարերի արդյունքներով կկազմավորվի բռնցքամարտի Հայաստանի հավաքականը, որը կնախապատրաստվի ամռանը Մինսկում կայանալիք Եվրոպայի առաջնությանը: