ՋԱԲՈՒՐՅԱՆՆ ՈՒ ՍԱՆՈՅԱՆՆ ԱՆՀԱՋՈՂՈՒԹՅԱՆ ՄԱՏՆՎԵՑԻՆ Թբիլիսիում ընթացող ազատ ոճի ըմբշամարտի Եվրոպայի առաջնության 2-րդ օրն անհաջող էր հայ ըմբիշների համար, որոնք չկարողացան մեդալ նվաճել: Մինչեւ 55 կգ քաշային կարգում Միհրան Ջաբուրյանը 1/8 եզրափակիչում վստահ հաղթանակ տոնեց հունգարացի Բենչե Յունաժի նկատմամբ: Սակայն քառորդ եզրափակիչում հայ ըմբիշը պարտվեց ռուսաստանցի Արտյոմ Գեբեկովին ու զրկվեց մեդալի համար պայքարը շարունակելու հնարավորությունից: Ավելի վատ ելույթ ունեցավ 2012-ի Եվրոպայի երիտասարդական առաջնության բրոնզե մեդալակիր Նարեկ Սանոյանը: Նա հավաքականի նորեկն է եւ փոխարինել էր վնասվածք ստացած Արթուր Առաքելյանին: Նարեկը մինչեւ 60 կգ քաշային կարգում առաջին գոտեմարտում պարտվեց Ուկրաինան ներկայացնող Նիկոլա Այվազյանին: Վերջինս էլ պայքարից դուրս մնաց 1/8 եզրափակիչումՙ զիջելով բուլղարացի Վլադիմիր Դուբովին: | 
