ԳԱՐԻ ԿԱՍՊԱՐՈՎԸ ԿՐԿԻՆ ԿՕԳՆԻ ՄԱԳՆՈՒՍ ԿԱՌԼՍԵՆԻՆ Ապրիլի 13-ին ծննդյան 50-ամյակը նշած շախմատի աշխարհի 13-րդ չեմպիոն Գարի Կասպարովը այս օրերին գտնվում է Օսլոյում: Նրան առաջարկվել է վերսկսել համագործակցությունը Մագնուս Կառլսենի հետ եւ օգնել նորվեգացի գրոսմայստերին հաղթելու աշխարհի չեմպիոն Վիշվանաթան Անանդին: Կասպարովը սիրով համաձայնվել է: «Հաճույքով կօգնեմ Կառլսենին: Լավ հարաբերություններ եմ պահպանում Կառլսենի եւ նրա շրջապատի հետ: Եթե Մագնուսը լավ կատարի տնային աշխատանքը եւ հոգեբանորեն պատրաստ լինի, ապա կնվաճի աշխարհի չեմպիոնի տիտղոսը: Սակայն աշխարհի չեմպիոնի տիտղոսի մրցամարտը տարբերվում է մյուս մրցաշարերից, քանի որ մշտապես խաղում ես միեւնույն մրցակցի դեմ: Չպետք է մոռանալ, որ Կառլսենի խաղում դեռեւս թույլ կողմեր կան, իսկ Անանդը դրանք հմտորեն օգտագործելու հարցում մեծ վարպետ է: Հնդիկ շախմատիստի առավելություններից մեկն էլ փորձառությունն է: Բացի այդ էլ, հավանաբար մրցախաղն անցկացվի Հնդկաստանում, ինչը եւս կարող է Անանդին որոշ առավելություն տալ», նշել է Գարի Կասպարովը: | 
