«ՁԻԹԱՊՏՈՒՂ ՎԱՃԱՌՈՂԻ ՈՐԴԻՆ» Հ. Ծ. Ֆրանսահայ ռեժիսորի նոր ֆիլմը Գլենդեյլի կենտրոնական գրադարանի դահլիճում ապրիլի 19-ին կայացել է ֆրանսահայ մրցանակակիր կինոարտադրիչ Մաթյու Զեյթինջիօղլուի վավերագրական «Ձիթապտուղ վաճառողի որդին» 76-րոպեանոց ֆիլմը, որը Թուրքիայում անցկացրած իր օրերի մասին է: Ըստ «Արմինյն միրոր սփեքթեյթրի»ՙ նա Թուրքիա է գնացել կնոջ հետՙ մեղրամիսը անցկացնելու եւ իր հայկական արմատները պարզելու համար: Տեղացիների հետ հարցուփորձերից ու քննարկումներից նա պարզել է, որ նոր սերունդը շարունակում է ժխտել հայերի ցեղասպանությունը: Ֆիլմը, որն ընդգրկում է հարցազրույցներ եւ պատմական փաստեր, ցուցադրվել է ավելի քան տասը միջազգային փառատոներում եւ մրցանակի արժանացել «Լոս Անջելեսի ֆիլմերի եւ սցենարների փառատոնում» եւ «Լոս Անջելեսի ֆիլմերի մրցանակաբաշխության» ժամանակ: Զեյթինջիօղլուն ծնվել է Վերսալում (Ֆրանսիա): Տնտեսագիտության եւ գործարարության գծով թեկնածուական է պաշտպանել Վերսալի համալսարանում: Հեղինակ է մի քանի կարճամետրաժ ֆիլմերի, որոնք մրցանակների են արժանացել տարբեր փառատոներում եւ ճանաչում բերել նրան: Դրանց շարքում հիշատակության արժանի են «Մարդը, որը քաղցած չէր», «Խոսիր ինձ հետ սիրո մասին» եւ «Բարերարն ու ագարակը» ֆիլմերը: Ներկայումս նա նոր վավերագրական ֆիլմ է պատրաստում Հնդկաստանում: | 
