ՌԻՉԱՐԴ ՀՈՎՀԱՆՆԻՍՅԱՆ - ԷԼԻ ՎԻԶԵԼ Հ. Ծ. երկխոսություն ցեղասպանության թեմայով Ժանո Պողոսյանը Օրանժից (Կալիֆոռնիա) տեղեկացնում է, որ Ուալլասի «Ամենայն Հավատո» մատուռում, հոծ բազմության ներկայությամբ, ապրիլի 17-ին տեղի է ունեցել երկխոսություն ցեղասպանությունը հիշելու պարտականության վերաբերյալ պատմաբան Ռիչարդ Հովհաննիսյանի եւ Նոբելյան մրցանակի դափնեկիր Էլի Վիզելի միջեւ (նկարումՙ ձախից): Հարգարժան զրուցակիցները կարեւորել են հայերի ցեղասպանության եւ Հոլոքոսթի զոհերի հիշատակը հարգելու եւ սերունդներին փոխանցելու մարդկության բարոյական պարտականությունը եւ արդարություն պահանջելու իրավունքը: Նրանք խոսել են իրենց անձնական եւ համայնքային փորձառությունների մասին, Հովհաննիսյանը հարցրել է, թե երբեւէ ամբողջական արդարություն կլինի՞, որին Վիզելը պատասխանել է «ոչ» նույնիսկ ճանաչման եւ փոխհատուցման դեպքում: Հովհաննիսյանն անմիջապես արձագանքել է, որ հայերը դեռ այդ ճանաչման եւ փոխհատուցմանն էլ չեն արժանացել Թուրքիայի կողմից: Դոկտ. Վիզելը այնուհետեւ խոսել է «հիշատակությունը կիրք դարձրած» հայերի մասին եւ թե ինչպես «հայոց դատը դարձավ նաեւ իմ դատը»: Որպես երկխոսության համակարգող հանդես է եկել Չեփման համալսարանի պատմության ֆակուլտետի ամբիոնի վարիչ Ջենիֆեր Քինը: | 
