ՀԱՅ ԾԱՆՐՈՐԴՆԵՐԸ ՆԱԽԱՊԱՏՐԱՍՏՎՈՒՄ ԵՆ ՈՒՆԻՎԵՐՍԻԱԴԱՅԻՆ Հուլիսի 6-17-ը Կազանում կանցկացվեն 27-րդ համաշխարհային ուսանողական խաղերը, որում Հայաստանի մարզիկները հանդես կգան 10 մարզաձեւում: Արդեն հայտնի է ծանրամարտի մրցումներին մասնակցող Հայաստանի թիմի կազմը: Կազանում մրցահարթակ դուրս կգան Սմբատ Մարգարյանը (56 կգ), Աղասի Աղասյանը (85 կգ) եւ Վարդան Դավթյանը (94 կգ): Մեր ուսանող ծանրորդները հավաքականի գլխավոր մարզիչ Պողոս Պողոսյանի գլխավորությամբ ներկայումս Ծաղկաձորում են նախապատրաստվում մրցումներին: Հավաքի ավարտական փուլը կանցկացվի Աբովյանի մարզաբազայում: Մեր ծանրորդներից սպասելիքները մեծ են: Հայաստանի ծանրամարտի ֆեդերացիայի գլխավոր քարտուղար Փաշիկ Ալավերդյանը նույնիսկ վստահ է, որ երեքն էլ նվաճելու են Ունվերսիադայի չեմպիոնի տիտղոսը: Մրցումներին պատրաստվող մեր եռյակից երկուսըՙ Աղասի Աղասյանն ու Վարդան Դավթյանը մասնակցել են 2 տարի առաջ օգոստոսին Չինաստանի Շենցզեն քաղաքում կայացած 26-րդ համաշխարհային Ունիվերսիադային: Աղասի Աղասյանը մինչեւ 77 կգ քաշային կարգում գերազանց ելույթ ունեցավՙ երկամարտի 337 կգ (151+186) արդյունքով նվաճելով Ունիվերսիադայի չեմպիոնի տիտղոսը: Նա անկախ Հայաստանի առաջին մարզիկն է, որ նման նվաճման հասավ համաշխարհային ուսանողական խաղերում: Իսկ ահա Վարդան Դավթյանի ելույթն անհաջող էր: Մինչեւ 94 կգ քաշային կարգում նա միայն մեկ մոտեցում հաջող ավարտեցՙ պոկելով 165 կգ-անոց ծանրաձողը: Հրում վարժությունում նա 0 ստացավՙ չկարողանալով բարձրացնել նախնական 196 կգ-ը: Նշենք, որ քաշային այդ կարգում հանդես եկած մեր 2-րդ պատվիրակիՙ Յուրի Վարդանյանի որդուՙ Նորայրի ելույթը եւս անհաջող էր: Նա պոկում վարժությունում միայն 3-րդ մոտեցմամբ բարձրացրեց 155 կգ, իսկ հրում վարժությանը չմասնակցեց: Չինաստանում մեր հավաքականին 2-րդ մեդալը պարգեւեց գերծանրքաշային Հայկ Հակոբյանը, որը երկամարտի 402 (186+216) կգ արդյունքով արժանացավ բրոնզե մեդալիՙ արծաթե պարգեւը մրցակցին զիջելով միայն անձնական ավելի ծանր քաշի պատճառով: Առանձին վարժություններում էլ Հայկը նվաճեց արծաթե եւ բրոնզե մեդալներ: Իսկ ահա մինչեւ 85 կգ քաշային կարգում Արամ Անդրիկյանը 0 ստացավ: | 
