ՊԱՏԵՐԱԶՄԸ ՍԻՐԻԱՅՈՒՄ ՄՂՈՒՄ Է ՀԱՅԵՐԻՆ ՕԳՆԵԼ ՄԻՄՅԱՆՑ Հ. Ծ. «Լոս Անջելես թայմսում» Բրիտանի Լիվայնը գրում է, որ Հալեպում ծնված, այժմ Գլենդեյլում անշարժ գույքի գործակալ Զավեն Խանջյանին հասկանալու համար անհրաժեշտ է մոտ մեկ դար հետ գնալ: «Հայերն այդ երկրում հաստատվել են այն բանից հետո, երբ 1915 թվին Թուրքիայում իրագործված ցեղասպանության օրերին տարագրվեցին դեպի անապատները: Հիմնականում արաբներով բնակեցված Սիրիան գրկաբաց ընդունեց հուսալքված, անօթեւան քրիստոնյաներին, որոնք հիմնականում ապաստան գտան Հալեպում: Խանջյանը ցանկանում է, որ համայնքը շարունակի կենսունակ մնալ: Բայց երկրին երախտապարտ լինելով հանդերձ, հազարավորներ լքում են այն եւ նույնիսկ հայերի ցեղասպանություն խորհրդանշող հուշարձանն է ավերվել: Մարդասիրական օգնությունը առաջնահերթ խնդիր է, բայց պատմականորեն կարեւոր նշանակություն ունեցող համայնքը պահպանելը շատ ավելի այժմեական խնդիր է: Անցյալ տարի սկզբնավորված «Սիրիահայերի օգնության հիմնադրամը» մարդասիրական այլ կազմակերպությունների հետ 500 հազար դոլար է ուղարկել սիրիահայերին: Հոլիվուդում կազմակերպված բարեգործական համերգից էլ հավելյալ 100 հազար դոլար է գոյացել: Այդ գումարներով սնունդ, հագուստ եւ դեղորայք է մատակարարվում Սիրիայի հայ կարիքավորներին: Նախքան հակամարտությունը մոտ 70 հազար հայեր էին ապրում Սիրիայում, որոնցից 70 տոկոսըՙ Հալեպում: Պատասխանատու մարմինները ցանկանում են, որ, հակառակ դժվարություններին, մարդիկ շարունակեն մնալ, որովհետեւ մշակութային հսկայական ժառանգություն գոյություն ունի այնտեղ, գրում է հոդվածագիրը: |
