ԻՐԱՆԱ-ԱՄԵՐԻԿՅԱՆ ԲԱՆԱԿՑՈՒԹՅՈՒՆՆԵՐ Պ. Ք. Ժնեւումՙ ՄԱԿ-ի եվրոպական կենտրոնակայանում, ավարտվել են իրանա-ամերիկյան բանակցությունները, որոնց ընթացքում քննարկվել են «միջուկային ճգնաժամի» հաղթահարման ուղիները: Մոտ 1 ժամ տեւած բանակցություններում իրանական կողմը ներկայացնում էր փոխարտգործնախարար Աբբաս Արաղչին, ամերիկյան կողմըՙ պետքարտուղարի տեղակալ Վենդի Շերմանը: Ֆրանսպրես գործակալության տվյալներով, Թեհրանը համաձայնել է միջազգային դիտորդների ընդունել իր միջուկային օբյեկտներում: Բանակցությունների բովանդակության առնչությամբ որեւէ պաշտոնական հայտարարություն չի տարածվել: Աբբաս Արաղչին Ռոյթերի թղթակցին ասել է, որ Իրանը «Վեցյակի» երկրներին ներկայացրել է առաջարկությունների փաթեթ, որը կարող է հանգեցնել «ճեղքման»: Նա ավելացրել է, որ առայժմ վաղ է խոսել որեւէ հաջողության մասին: «Նյու Յորք թայմս» թերթի կայքէջը գրում է, որ իրանցիների փաթեթը ներկայացվել էր անգլերեն եւ PowerPoint ծրագրի օգտագործմամբ: Այլ մանրամասնություններ չեն հաղորդվում: Միայն մեջբերվում է պետդեպարտամենտի ներկայացուցիչներից մեկի հետեւյալ խոսքը. «Առաջին անգամ անցկացրինք շատ մանրակրկիտ տեխնիկական քննարկումներ»: Դատելով ամերիկյան եւ եվրոպական լրատվամիջոցների հրապարակումներից, «Վեցյակը» քննարկում է Թեհրանի զիջումների դիմաց հակաիրանական տնտեսական պատժամիջոցները մեղմացնելու հնարավորությունը: Կարեւոր է համարվում Իրանի միջուկային ծրագրի մասնակի կրճատման քայլերի վերահսկման մեխանիզմի հարցը: «Ուոլ Սթրիթ ջոռնըլ» թերթը պաշտոնական աղբյուրներ վկայակոչելով գրում է, որ Բարաք Օբամայի վարչակազմը ծանրութեթեւ է անում Իրանին այսուհետեւ էլ ուրանի հարստացման իրավունք տրամադրելու հնարավորությունը: Օբաման առայժմ ձեռնպահ է մնում միանշանակ հայտարարություններից: Սակայն նրա շրջապատում հասկացնում են, որ նա Թեհրանին զիջումներ չի անի, քանի դեռ չի ստացել իրանական միջուկային ծրագրի խաղաղ բնույթը վկայող ապացույցներ: Պատժամիջոցների մեղմացումը հնարավոր է, եթե Իրանը երկխոսություն սկսի եւ ենթարկվի միջազգային ընկերակցության պահանջներին: Ի դեպ, ՄԱԿ-ի Ընդհանուր ժողովում ունեցած ելույթում Օբաման ընդունել էր խաղաղ ատոմային էներգետիկան զարգացնելու Իրանի իրավունքը: | 
