ՄՐՑԱՇԱՐՆ ԱՎԱՐՏԵՑԻՆՔ ԻՏԱԼԱՑԻՆԵՐԻ ՀԵՏ ԳՐԱՆՑՎԱԾ ՊԱՏՎԱԲԵՐ ՈՉ-ՈՔԻՈՎ Սեփական հարկի տակ ունեցած անհաջող ելույթները հավաքականին զրկեցին ուղեգրի համար պայքարելու հնարավորությունից Ֆուտբոլի Հայաստանի ազգային հավաքականն աշխարհի առաջնության ընտրական մրցաշարն ավարտեց իտալացիների հետ Նեապոլում կայացած խաղում գրանցված պատվաբեր ոչ-ոքիով: Ընդ որում մեր ընտրանին Յուրա Մովսիսյանի եւ Հենրիխ Մխիթարյանի խփած գոլերի շնորհիվ խաղի ընթացքում 2 անգամ հաշվի մեջ առջեւից էր ընթանում: Մխիթարյանը 12 գնդակով դարձավ Հայաստանի հավաքականի բոլոր տարիների լավագույն ռմբարկունՙ շրջանցելով Արթուր Պետրոսյանին, որը 11 գոլ էր խփել: Թեեւ մեր հավաքականն ընտրական B խմբում գրավեց միայն նախավերջինՙ 5-րդ տեղը, սակայն գրանցած ցուցանիշները ռեկորդային են աշխարհի առաջնության նախորդ 4 մրցաշարերի համեմատ: Իսկ արտագնա հանդիպումներում 5 խաղում վաստակած 10 միավորն ընդհանրապես ռեկորդային արդյունք է աշխարհի եւ Եվրոպայի առաջնությունների ընտրական նախորդ բոլոր մրցաշարերի համեմատ: Եվ եթե մեր ֆուտբոլիստները սեփական հարկի տակ գոնե որոշ չափով հաջող հանդես գային, ապա կարող էին անցումային խաղերի մասնակից դառնալ: Այժմ, երբ հետադարձ հայացք ես նետում ընտրական մրցաշարում մեր հավաքականի ելույթներին, ափսոսում ես, որ որոշ հանդիպումներում թույլ տված սխալների պատճառով զրկվեցինք եզրափակիչի ուղեգրի համար պայքարելու իրական հնարավորությունից: Իհարկե, հավաքականի ելույթների վերլուծությունը դեռեւս առջեւում է: Սակայն այժմվանից մեր հավաքականի մարզիչները պետք է մտածեն Եվրո-2016-ի ընտրական մրցաշարում հաջող հանդես գալու եւ ուղեգիր նվաճելու մասին, մանավանդ, որ եզրափակիչ փուլում 16-ի փոխարեն խաղալու են 24 հավաքականներ: ՀՀ հավաքականի գլխավոր մարզիչ Վարդան Մինասյանը խոստացել է Երեւանում կազմակերպվելիք մամուլի ասուլիսում անդրադառնալ ընտրական մրցաշարի արդյունքներին: Իսկ իտալացիների հետ խաղից հետո նա հետեւյալն է ասել. «Հետաքրքրական խաղ ստացվեց: Հանդիպման արդյունքը համապատասխանում էր խաղի ընթացքին: Մեր հավաքականի ուժեղ կողմը պաշտպանությունից հարձակման անցնելն է: Մենք այդպես ավելի հաճախ խաղում ենք մրցակցի դաշտում: Գուցե դրանով էլ պայմանավորված է հաջող խաղը հյուրընկալվելիս: Մարիո Բալոտելիին միշտ էլ բարձր եմ գնահատել, այսօր էլ դրանում համոզվեցի: Հենրիխ Մխիթարյանը շատ կարեւոր ֆուտբոլիստ է Հայաստանի հավաքականի համար, ուստի պատահական չէ, որ նա խաղում է «Բորուսիայում»»: Իտալիայի հավաքականի գլխավոր մարզիչ Չեզարե Պրանդելին հետեւյալն է նշել. «Նախորդ տարի Երեւանում կայացած խաղից հետո Հայաստանը զգալիորեն առաջադիմել է: Հայ ֆուտբոլիստներն ավելի բարձր որակներ դրսեւորեցին այսօրվա խաղում: Նրանք բավական արագ էին խաղում: ՀՀ հավաքականն ունի տեխնիկապես լավ պատրաստված ֆուտբոլիստներ, որոնք սրում են խաղը»: Ներկայացնենք նաեւ իտալական մամուլի արձագանքները, որոնք առանձնացրել է Նեապոլում հանդիպմանը ներկա armsport.am-ի թղթակիցը: La Gazzetta dello Sport - Հայաստանի հետ ոչ-ոքին, ինչպես նաեւ Ուրուգվայի եւ Կոլումբիայի հավաքականների հաղթանակը համապատասխանաբար Արգենտինայի եւ Պարագվայի ընտրանիների նկատմամբ զրկեցին Իտալիային աշխարհի առաջնության եզրափակիչ փուլի վիճակահանության ժամանակ 1-ին զամբյուղում հայտնվելու հնարավորությունից: Corriere dello Sport - Պրանդելին սխալվեց, որ մեկնարկային կազմում Բալոտելիին խաղադաշտ դուրս չբերեց: Միայն 54-րդ րոպեին նա փոխարինման մտավ եւ օգտագործեց իր 2 հնարավորություններից մեկըՙ իտալացիներին փրկելով պարտությունից: Football Italia - Հայաստանը բացահայտեց Իտալիայի սխալները մի խաղում, որտեղ տանտերերը 2 անգամ հաշվի մեջ հետապնդողի դերում էին: Calciomercato - Մխիթարյանը լավագույնն էր հյուրերի կազմում եւ լրացուցիչ անգամ ապացուցեց իր բարձրակարգ լինելը: Ամեն անգամ, երբ գնդակը հայտնվում էր նրա մոտ, նա վտանգ էր ներկայացնում Իտալիայի համար: Tuttosport - Բարեբախտաբար Իտալիային հաջողվեց խուսափել պարտությունից եւ սեփական դաշտում մնալ անպարտելի 2014-ի ընտրական մրցաշարում: Sky Sport Italy - Իտալիան դաս ստացավ Հայաստանից: Պրանդելիի թիմը կարողացավ խուսափել պարտությունից, բայց կորցրեց իր տեղն առաջին զամբյուղում: La Stampa - Հայաստանի հավաքականի հետ մրցավեճից հետո կասկած չկա, որ Իտալիայի ընտրանին 15-16 որակյալ ֆուտբոլիստներ ունի: Մովսիսյանն ուղղակի լուծեց Աստորիի հարցերը: | 
