ԲՐԱՀԻՄԻ. «ԺՆԵՎԻ ԿՈՆՖԵՐԱՆՍԸ ԿԱՐՈՂ Է ԿԱՅԱՆԱԼ ՄԻՆՉԵՎ ՏԱՐԵՎԵՐՋ» Սիրիայում Արաբական պետությունների լիգայի հատուկ ներկայացուցիչ Լախդար Բրահիմին հայտարարել է, որ Սիրիայի հակամարտությանը նվիրված Ժնեւի հաշտության կոնֆերանսը հետաձգվում է, բայց ինքը հույս ունի անցկացնել մինչեւ տարեվերջ: Այդ մասին հաղորդում է BBC News հեռուստաալիքը: Կոնֆերանսը հետաձգվում է ներկայացուցչության եւ օրակարգի հարցերի առնչությամբ սիրիական ընդդիմության ներքին տարաձայնությունների պատճառով, ասել է Բրահիմինՙ ավելացնելով, որ նոյեմբերի 25-ին ինքը հանդիպումներ է ունենալու ամերիկացի եւ ռուսաստանցի դիվանագետների հետ: Նա արդեն բանակցել է ԱՄՆ պետքարտուղարի տեղակալ Ուենդի Շերմանի, ՌԴ փոխարտգործնախարարներ Միխայիլ Բոգդանովի եւ Գենադի Գատիլովի հետ, հանդիպումներ ունեցել Մեծ Բրիտանիայի, Ֆրանսիայի, Չինաստանի, Լիբանանի, Իրաքի, Հորդանանի եւ Թուրքիայի ներկայացուցիչների հետ: Կոնֆերանսի հետաձգման մյուս պատճառն այն է, որ Բաշար Ասադի կառավարությունը պատրաստ չէ քննարկել իշխանության փոխանցման հարցը, իսկ ԱՄՆ-ը եւ Ռուսաստանը չեն կարողանում փոխհամաձայնության գալ Իրանի մասնակցության հարցում: Սիրիայի նախագահի խորհրդական Բուսայնա Շաաբանը BBC-ի թղթակցին հայտնել է, որ Բաշար Ասադի պաշտոնաթողության հարցը չի քննարկվում, եւ որ նա կհեռանա միայն 2014 թ. նախագահական ընտրություններում պարտվելու դեպքում: | 
