ԳՅՈՒՄՐՈՒ ԴՐԱՄԱՏԻԿԱԿԱՆԸ ՀԱՆԴԵՍ ԿԳԱ ԵՂԵԳՆԱՁՈՐՈՒՄ, ԳՈՐԻՍՈՒՄ ԵՎ ՍՏԵՓԱՆԱԿԵՐՏՈՒՄ Գ. Մ. Գյումրու Վարդան Աճեմյանի անվան պետական դրամատիկական թատրոնը նոյեմբերի 9-11-ը հյուրախաղերով հանդես կգա Եղեգնաձորում, Գորիսում եւ Ստեփանակերտում: Մարզերի եւ Արցախի հանդիսատեսին կներկայացվի թատրոնի խաղացանկի ամենաշատ ցուցադրված բեմադրություններից մեկըՙ «Չար ոգին»: Թեկուզ մեկ ներկայացմամբ հյուրախաղային այս կարճ շրջագայությունը հնարավոր է դարձել ՀՀ մշակույթի նախարարության ֆինանսական աջակցության շնորհիվ: Թատրոնի ստեղծագործական կոլեկտիվը դեկտեմբերին վանաձորցիներին կներկայացնի Լեւոն Մութաֆյանի «Առնետները», որով մեկնարկել է աճեմյանցիների ներկա թատերաշրջանը: Իսկ արդեն եկող տարիՙ ապրիլ ամսին, գյումրեցի արտիստներն իրենց խաղացանկի հինգ ներկայացումներ կհանձնեն մայրաքաղաք Երեւանի հանդիսատեսի դատին: Կանցկացվի պարային մրցույթ-փառատոնՙ «Աշնանային երանգներ» Շիրակի, Լոռու, Տավուշի մարզերի եւ Երեւանի 25 պարախմբեր կմասնակցեն «Աշնանային երանգներ» խորագրով պարի մրցույթ-փառատոնին, որը կայանալու է Գյումրիում նոյեմբերի 10-ին: Ինչպես տեղեկացրել են կազմակերպիչները, փառատոնի մեկնարկը տրվելու է տոնական երթով, մասնակից խմբերը Վարդանանց հրապարակից քաղաքի կենտրոնական փողոցներով շարժվելու եւ հասնելու են Վարդան Աճեմյանի անվան պետական դրամատիկական թատրոն: Խմբերը թատրոնի բեմում հանդես են գալու մեկական մրցութային, ապա համերգային ելույթներով: Վերջին տարիներին այստեղ անցկացվող պարային փառատոները նախատեսվում է դարձնել ավանդական: | 
