ՀԱՐՈՒԹՅՈՒՆ ԽԱՉԱՏՐՅԱՆԻ ՆՈՐ ՖԻԼՄԸ` «ՀԱՅԿ. ՓԱԽՈՒՍՏ» Մ. Հ. Նոյեմբերի 7-ին Մոսկվա կինոթատրոնի «Կապույտ» դահլիճում տեղի կունենա Հարություն Խաչատրյանի «Անվերջ փախուստ, հավերժ վերադարձ» հեղինակային կինոշարքի առաջին ֆիլմի` «Հայկ. փախուստի» ցուցադրությունը: Կինոռեժիսոր Հարություն Խաչատրյանին տարիներ շարունակ հետաքրքրել է այն մարդկանց ճակատագիրն ու կենսակերպը, որոնք տարբեր պատճառներով լքել են հայրենիքը կամ ընդհակառակը, ծնվելով եւ կյանքի զգալի մասն ապրելով տարբեր երկրներում, հետ են վերադարձել Հայաստան: «Անվերջ փախուստ, հավերժ վերադարձ» ֆիլմաշարը նվիրված է այսօրվա Հայաստանի ամենացավոտ խնդրին արտագաղթին: Յուրաքանչյուր ֆիլմում պատմվում է մի հերոսի ռեժիսորի, ինժեների, նկարչի, դերասանի, երգահանի մասին ... «Հայկ. փախուստ» Ֆիլմի նյութը ընդգրկում է 1987-ից մինչեւ մեր օրերը նկարահանված տեսանյութեր: Ֆիլմի պատումը թատրոնի ռեժիսոր Հայկի մասին է. նրա նախաձեռնությունների, ձեռքբերումների, պայքարի ու անվերջ ձգվող փնտրտուքների մասին: Թվում է` 20 տարիների ընթացքում նրա խնդիրները չեն լուծվել, նրա հակասություններով լի խոսքը գրեթե չի փոխվել.... Ֆիլմն այս տարի «Հայակ» ազգային կինոմրցանակաբաշխությունում արժանացավ «Լավագույն վավերագրական ֆիլմ» եւ «Լավագույն ռեժիսոր» անվանակարգերի գլխավոր մրցանակներին: | 
