«Be Creative» ՆՇԱՆԱԲԱՆՈՎ ԿԱՆՑԿԱՑՎԻ «ՄԱՆԿԱԿԱՆ ԵՎՐՈՏԵՍԻԼ-2013»-Ը ՄԱՆԱՆԱ ՀՈՎԱԿԻՄՅԱՆ «Մանկական Եվրոտեսիլ» երգի մրցույթն այս տարի կանցկացվի Ուկրաինայի Արվեստների ազգային պալատում նոյեմբերի 30-ին «Be Creative» («Եղիր ստեղծագործ») նշանաբանի ներքո: Հայաստանը Եվրոպայի այս հեղինակավոր պատանեկան մրցույթին ներկայանում է 7-րդ անգամ: Ընդհանուր առմամբ մրցույթին այս տարի կմասնակցի 12 երկիր Հայաստան (Մոնիկա Ավանեսյան` «Choco Factory»), Բելառուս (Իլյա Վոլկով` «Poy so Mnoy»), Վրաստան (Սմայլ Շոփ` «Give Your Smile»), Մոլդովա (Ռաֆայել Բոբեյկա` «Cum s fim»), Մակեդոնիա (Բարբարա Պոպովիչ` «Ohrid i muzika»), Մալթա (Գայա Կոչի` «The Start»), Նիդերլանդներ (Միլենե եւ Ռոզանե` «Double Me»), Ռուսաստան (Դայանա Կիրիլովա` «Dream on»), Սան Մարինո (Միշելե Պերնիոլա` «O-o-O Sole intorno a me»), Շվեդիա (Էլիաս` «Det Պr dit vi ska»), Ուկրաինա (Սոֆիա Տարասովա` «We Are One», Ադրբեջան (Ռուսթամ Կարիմով` «Me And My Guitar»): «Մանկական Եվրոտեսիլ-2013» տարբերանշանը Puzzle Man է: Փազլ հավաքում են աշխարհի բոլոր երեխաները, որը զարգացնում է երեխայի ստեղծագործական միտքը եւ խորհրդանշում է տարբեր մասնիկներից բաղկացած միասնություն: Եվրոպայի տարբեր ծայրերից հավաքված երեխաները կհամախմբվեն մեկ գաղափարի շուրջ: Ըստ Ուկրաինայի Ազգային հեռուստաընկերության գործադիր տնօրեն Ալեքսանդր Պանտելեյմոնովի, «Be Creative» նշանաբանը շատ համահունչ է Puzzle Man տարբերանշանի հետ. «Մեր աշխատանքային թիմը ոգեշնչվել է այս թեմայով եւ օգտագործել այս կոնցեպտը բեմի ձեւավորման մեջ. այն գլուխկոտրուկ կհիշեցնի: Ժամանակակից տեխնոլոգիաները կօգնեն մեզ հեքիաթային մթնոլորտ ստեղծել եւ կենդանություն տալ հիմնական կոնցեպտին»: Մասնակիցների ելույթների հերթականությունը կորոշվի մրցույթի բացմանը նվիրված պաշտոնական խնջույքի ժամանակ, որը կանցկացվի նոյեմբերի 25-ին: Այս տարի մրցույթի անցկացման կարգում մի շարք փոփոխություններ եւ նորամուծություններ են կատարվել: Ներկայացվող երգերի մաքսիմալ թույլատրելի տեւողությունը 3 րոպե է: Միավորներ հայտնող պատանիները քվեարկության արդյունքները կհայտարարեն ոչ թե տեսանյութի միջոցով, այլ հենց համերգային բեմից: Հայաստանյան քվեարկության արդյունքները կներկայացնի «Մանկական Եվրոտեսիլ- 2013»-ի հայաստանյան եզրափակիչ փուլի 2-րդ մրցանակակիր Դավիթ Վարդանյանը: Այս տարի նախորդ մեկի փոխարեն կլինի 3 մրցանակային տեղ: Մրցանակակիրները կպարգեւատրվեն Փազլմեն գավաթներով, իսկ առաջին տեղը զբաղեցրած մասնակիցը հնարավորություն կստանա մասնակցելու Եվրոտեսիլ 2014-ին: Իսկ հատուկ հյուրը կլինի «Մանկական Եվրոտեսիլ-2012»-ի հաղթող մասնակից Անաստասիա Պետրիկը: Մրցույթը կվարեն Զլատա Օգնեւիչը եւ հաղորդավար Թիմուր Միրոշնիչենկոն: | 
