ԹՈՒՐՔԻԱՅՈՒՄ ՏԱՐԱՍԵՌ ՈՒՍԱՆՈՂՆԵՐԸ ԿԱՊՐԵՆ ՏԱՐԲԵՐ ՀԱՆՐԱԿԱՑԱՐԱՆՆԵՐՈՒՄ Թուրքիայի վարչապետ Ռեջեփ Թայիփ Էրդողանը հայտարարել է, որ իր կառավարությունը կջանա հասնել այն բանին, որ ուսանողները եւ ուսանողուհիները բնակվեն հանրակացարանների տարբեր շենքերում: Այդ մասին հաղորդում է Ասոշիեյթեդ պրես գործակալությունը: Էրդողանի խոսքերով, պետությունը չպետք է միջամտի քաղաքացիների մասնավոր կյանքին, սակայն ուսանողների անվտանգությունը կառավարության պարտքն է նրանց ծնողների հանդեպ, գրում է Huriyet Daily News թերթը: Վարչապետը միասնական հանրակացարանների առնչությամբ մասնավորապես հայտարարել է. «Հայտնի չէ, թե ինչ է տեղի ունենում այդ հաստատություններում... Մենք, որպես պահպանողական ժողովրդավարական կառավարություն, պարտավոր ենք միջամտել»: Ըստ որում, վարչապետը նշել է, որ պետական հանրակացարանների 3/4-ը արդեն բաժանված է սեռային սկզբունքով: Ներկայումս խոսքը մնացյալ շենքերի, ինչպես նաեւ մասնավոր հանրակացարանների մասին է: Էրդողանի կառավարությունը եւ նրա Արդարության ու զարգացման կուսակցությունը հաճախ մեղադրվում են աշխարհիկ պետություն Թուրքիան իսլամականացնելու փորձերի մեջ: Մասնավորապես 2013-ի աշնանը վերցավեց պետական հիմնարկներում հիջաբ կրելու արգելքը, որը գործել էր վերջին 10 տարիներին: Մեկ տարի առաջ Էրդողանը ստորագրել էր կրթությանը վերաբերող նոր օրենք, որն ամրապնդում է իսլամական հոգեւոր դպրոցների դիրքերը: Օրենքի ստորագրումը հարուցել էր աշխարհիկության կողմնակիցների վրդովմունքը: 2013-ի մայիս-հուլիսին Ստամբուլում եւ այլ քաղաքներում ընդդիմության ցույցերի մասնակիցները Էրդողանին մեղադրել էին երկիրն իսլամականացնելու մեջ եւ պահանջել էին նրա հրաժարականը: Անկարգությունների հետեւանքով տուժել էր մոտ 7 հազար մարդ: Էրդողանը եւ իր կողմնակիցները պնդում են, թե իրենք սոսկ «կարգավորում» են այն մարդկանց կյանքը, ովքեր ձգտում են կատարել կրոնական բոլոր ծեսերը: Իշխանությունները բողոքի ցույցերի մասնակիցներին մեղադրում են արտերկրից հովանավորվելու մեջ: | 
