ՖԻԼԱԴԵԼՖԻԱՅԻ ԹՄՄ-Ն ՊԱՏՎՈՒՄ Է ԴՈԿՏ. ՏԻՐԱՆ ԵՎ ԳՈՒՏՑԻ ՄԻՔԱՅԵԼՅԱՆՆԵՐԻՆ Հ. Ծ. Ֆիլադելֆիայի Թեքեյան մշակութային միության հիմնադիրներ դոկտ. Տիրան եւ իր կողակիցըՙ Գուտցի Միքայելյանները մեծարանքի են արժանացել մասնաճյուղի 40-րդ տարեդարձի առթիվ կազմակերպված հանդիսության ընթացքում: Նրանց շնորհվել է Գլաձորի մանրանկարչության դպրոցի մասին պատմող անգլերեն լեզվով հրատարակված կատալոգը: Ուինվորդի Սբ. Սահակ-Մեսրոպ եկեղեցու Հայթայան դահլիճում կայացած հանդիսությունը բացել է մասնաճյուղի հիմնադիր-ղեկավարներից Անթուան Բազարբաշյանը, ով ողջույնի խոսքերից հետո հանդիսությունը վարելու համար բեմ է հրավիրել Մայիս Սիփանին: Գեղարվեստական բաժնում ելույթներ են ունեցել Մանյա Արաբաթլյանը (ասմունքՙ Թեքեյանի «Եկեղեցին հայկական»), Ռոզ Զարդարյանը (երգՙ «Քեզ եմ մնում անուշ գարուն»), Մադլեն Գուչյանը (երգՙ ամերիկյան «Քանթրի» երգեր կիթառի ընկերակցությամբ) արժանանալով ներկաների ծափահարություններին: Այնուհետեւ պատվո հյուրերին ներկայացրել են երեցկին Անժել Մեթճյանը եւ դոկտ. Հարություն Արզումանյանը: Առաջինը գովասանական խոսքերով պատմել է Գուտցի Միքայելյանի անցած ուղու մասին, առանձնացնելով բուժքույրական, հոգեբանության, գրակա, հասարակագիտության եւ միջազգային գրականության ասպարեզներում նրա նվաճումները, ինչպես նաեւ վերջերս լույս տեսած նրա «Աշնան տերեւները» հատորը: Երկրորդըՙ Մոնրեալից հատուկ հրավիրված, մասնագիտությամբ բժիշկ եւ Թեքեյան մշակութային միության տնօրենների խորհրդի նախագահ դոկտ. Հ. Արզումանյանը անդրադարձել է նախ ԹՄՄ-ի հիմնադրման պատմությանը (1947 թվին Բեյրութում), ապա ներկայացրել դոկտ. Տիրան Միքայելյանին, ով ավարտել է Բեյրութի Ամերիկյան համալսարանը 1954-ին եւ դարձել վիրաբույժ, այնուհետեւ շարունակել իր ուսումը Ամերիկայումՙ Ջոն Հոփկինս համալսարանում: Նրան հրավիրել են գլխավորելու Ֆիլադելֆիայի Ջեֆերսոն հիվանդանոցի քիթ-կոկորդի բաժինը: Պրոֆ. Բարունակ Թովմասյանի հորդորանքով եւ Միքայելյանների ու Բազարբաշյանի ջանքերով հիմնադրվում է Ֆիլադելֆիայի ԹՄՄ-ն, որը կազմակերպության ամենաակտիվ մասնաճյուղերից մեկն է դառնում կարճ ժամանակ անց: Հանդիսությունը ավարտվել է վերոնշյալ եկեղեցու հոգեւոր հովիվ Օշական Գյուլգյուլյանի գնահատանքի խոսքերով եւ օրհնությամբ: | 
