ԳԵՐՄԱՆԻԱՆ ԱՎԻԱԲԱԶԱ ԿԲԱՑԻ ԹՈՒՐՔԻԱՅՈՒՄ Պ. Ք. Գերմանիայի պաշտպանության նախարարությունը ծրագրում է սեփական ավիաբազա կառուցել Թուրքիայի տարածքում, Սիրիայի սահմանի մոտակայքում: Այդ մասին հաղորդում է «Շպիգել» շաբաթահանդեսըՙ վկայակոչելով գաղտնազերծված փաստաթղթեր: Ավիաբազան կտեղաբաշխվի ԱՄՆ-ի եւ Թուրքիայի օդուժի «Ինջիռլիք» ռազմակայանի տարածքում: Հենակետը նախատեսվում է գերմանական Tornado ռազմօդանավերի համար, որոնք օգտագործվում են Սիրիայում «Իսլամական պետության» դեմ ուղղված գործողության շրջանակներում առաջադրանքների կատարման նպատակով: Ինչպես նշում է «Շպիգելը», այդ որոշումը վկայում է, որ Բեռլինը պատրաստվում է Սիրիայում երկարաժամկետ գործողության: Փաստաթղթերից պարզ է դառնում, որ առաջիկա վեց ամիսներին Գերմանիան մոտ 10 մլն եվրո է ծախսելու Tornado-ների եւ «Էրբաս» լիցքավորիչ օդանավերի թռիչքուղիների կառուցման վրա: Պաշտպանության նախարարությունը հավելյալ կարգով 15 մլն եվրո կհատկացնի 400 զինվորի համար զորանոցների շինարարությանը: Եվս 34 մլն եվրո կհատկացվի լիովին հանդերձավորված հրամանատարական կետի կառուցմանը: Օբյեկտների մեծ մասի շինարարությունը պետք է ավարտվի մինչեւ 2017-ի ամառվա սկիզբը: Ծախսերի ընդհանուր գումարը կարող է կազմել շուրջ 65 մլն եվրո: | 
