«ԱԿՕՍ-Ի» ԴԵՄ ՍՊԱՌՆԱԼԻՔԻ ԳՈՐԾԸ ՎԵՐԱՆԱՅՎԵԼ Է Հ. Ծ. Ստամբուլի վճռաբեկ դատարանը բեկանել է անցյալ նոյեմբերին ազատ արձակված թուրքական ազգայնամոլական կուսակցության Ստամբուլի մասնաճյուղի նախագահ Բիլալ Գյոկչեյրուտի եւ Թուրան կազմակերպության նախագահ Էրկան Ուչարի վճիռը, համարելով, որ նրանց կատարածը «ատելություն եւ թշնամանք էր հրահրում»: Հիշեցնենք, որ այս երկուսի դեմ «Ակօս» թերթի խմբագրությունը քրեական գործ էր հարուցել այն բանից հետո, երբ 2015-ի ապրիլի 24-ին խմբագրության դռանը սեւ ծաղկեպսակ էր հայտնաբերել եւ հայտարարություն, որտեղ ասվում էր. «Մի գիշեր մենք այցելելու ենք ձեզ անսպասելիորեն»: Դատական գործ էր հարուցվել եւ 2016-ի նոյեմբերի 18-ի նիստին «հանցագործության տարրերի չգոյության» հետեւանքով նրանց ազատ էր արձակել դատարանը, որից հետո «Ակօս-ի» խմբագրությունը դիմել էր վճռաբեկ դատարան: Վերջինս հղում կատարելով մարդու իրավունքների եվրոպական համաժողովին, նշել է, որ «ժամանակակից երկրների մեծամասնությունում արժանապատվության դեմ հնչած թշնամանք եւ ատելություն սերմանող արտահայտությունները այլեւս խոսքի ազատության դրսեւորումեր չեն համարվում, այլ պատժելի հանցագործություն»: |
