ԵՐԱԽՏԱՊԱՐՏ ԵՄ ԲԺԻՇԿՆԵՐԻՆ ՄԱՆՎԵԼ ՄԻԿՈՅԱՆ, Վանաձոր Բժշկի մասնագիտությունն այն բացառիկներից է, որն ամեն օր, իր դժվարություններով ու լարվածությամբ հանդերձ ուղեկցվում է բուժառուների երախտագիտության եւ օրհնանքի դրսեւորումներով: Բժշկի ապրած ամեն մի օրը կարեւորվում է մարդկային փրկված կյանքերով, մարդկանց ապաքինված տեսնելու անփոխարինելի բերկրանքով: Ինձ բախտ վիճակվեց մեկ շաբաթ գտնվելու Երեւանի Մ. Հերացու անվան պետական բժշկական համալսարանի հարեւանությամբ գործող համալսարանական թիվ 1 հիվանդանոցային համալիրում: Բավականին ծանր ուրոլոգիական խնդիրներ ունենալով, չէի պատկերացնում, թե ինչ է լինելու իմ վիճակը: Հիվանդանոցային համալիրի տնօրեն, բժշկական գիտությունների դոկտոր, պրոֆեսոր, Երեւան քաղաքի գլխավոր ուրոլոգ Արեն Յուրիի Բաբլումյանը , բժիշկ Գեւորգ Մեխակի Հարությունյանը , այլ բուժաշխատողներ դրսեւորեցին էքստրեմալ պայմաններում հստակ կողմորոշվելու, ճիշտ ժամանակին վիրահատական ամենաօպտիմալ միջամտությունը ցուցաբերելու բառացիկ կարողություններ: Շնորհիվ այդ ամենի, ես կարողացա վերադառնալ աշխատանքի եւ համոզված եմ, որ հետագա բուժումների շնորհիվ ամբողջովին կապաքինվեմ: Խորին երախտագիտությունս եմ հայտնում Արեն Բաբլումյանին, հիվանդանոցային համալիրի ուրոլոգիական կլինիկայի ղեկավար Մհեր Ռաֆայելի Ջավախյանին , Գեւորգ Հարությունյանին եւ կլինիկայի ողջ բուժանձնակազմինՙ մասնագիտական բարձր կարողությունների ու հոգատար վերաբերմունքի համար: |
