ԿԱՆԱԴԱՀԱՅՈՒԹՅՈՒՆԸ ԵՐԱԽՏԱՊԱՐՏ Է ԿԱՌԱՎԱՐՈՒԹՅԱՆԸ Հ. Ծ. Ակնկալվում է, որ այսօր, ապրիլի 24-ին, մոտ 1500 կանադահայեր երկրի տարբեր կողմերից հավաքվելու են «խորհրդարանական բլուր» կոչվող վայրումՙ ունկնդրելու խորհրդարանական պատգամավորների, համայնքային առաջնորդների եւ արժանապատիվ մտավորականների ելույթներըՙ նվիրված օսմանյան թուրքերի կողմից 1915-23 թվերին ընդդեմ հայերի ծրագրված եւ իրագործված ցեղասպանությանը: Հավաքի մասնակիցները, ըստ այդ առթիվ խմբագրությանը հասցեագրված հաղորդագրության, այնուհետեւ խաղաղ երթ են կազմակերպելու դեպի Օտտավայում թուրքական դեսպանատան շենքը: «Հայերը վճռական են արդարությանը հետամուտ լինելու գործում: Թուրքիայի կառավարությանը երբեք չի հաջողվի վերաշարադրել պատմությունը: Աշխարհը երբեք չի մոռանա: Կանադացիները երբեք չեն մոռանա: Մենք երբեք չենք մոռանա: Միեւնույն ժամանակ մենք բախտավոր ենք, որ ապրում ենք մի երկրում, որտեղ խորհրդարանը, կառավարությունը եւ անձամբ վարչապետ Սթիվեն Հարպերը ճանաչել են պաշտոնապես հայերի ցեղասպանությունը: Մենք երախտապարտ ենք արդարությանն ու ճշմարտությանը միտված մեր կառավարության գործադրած ջանքերի համար», նշել է այս առթիվ Կանադայի Հայ ազգային կոմիտեի (Հայ դատի) նախագահ Ժիրայր Պասմաճյանը: | 
