«ԳԱԶԱՆԸ ԼՈՒՍՆԻ ՎՐԱ» ՊԻԵՍԸ ԱՌԱՋԻՆ ԱՆԳԱՄ ՀԱՅԵՐԵՆ ՄՈՆՐԵԱԼՈՒՄ ՀԱԿՈԲ ԾՈՒԼԻԿՅԱՆ Հռչակավոր թատերագիր Րիչարդ Կալինոսկու «Գազանը լուսնի վրա» (The Beast on the moon) թատերգությունը թարգմանված է 13 լեզուների, որոնցից վերջինըՙ հայերեն կատարված, ըստ Մոնրեալի «Ապագայ» շաբաթաթերթի լրատվության, «բացառիկ յաջողութեամբ» մոնրեալաբնակ տիկին Քրիստինե Տրդատյան-Գույումճյանի կողմէ Թեքեյան մշակութային միության «Հայ բեմ» թատերախմբի առաջարկով: Այս հայերեն թարգմանությունն էլ ահա առաջին անգամ Մոնրեալում բեմ է բարձրացրել տաղանդավոր դերասանուհի եւ բեմադրիչ Նանսի Իսսա Թորոսյանը, որին արդեն անդրադարձել ենք իր նախորդՙ Մովսես Պչաքճյանի «Անկարելի կարելին» պիեսի ներկայացման առիթով: «Գազանը...» Մոնրեալի Բոբուա թատրոնում ներկայացվել է ապրիլի 13-ին ֆրանսերեն եւ ապրիլի 21-ինՙ անգլերեն ենթագրությամբՙ հայերենին զուգահեռ: Մինչ օրս պիեսը ներկայացվել է, ըստ նույն լրատվության, 17 երկրներում եւ արժանացել բազմաթիվ պարգեւների: Փարիզում 2001-ինՙ հինգ «Մոլիեռ» եւ «Լավագույն թատերախաղ» մրցանակների, Բուենոս Այրեսում, դարձյալ 2001-ինՙ «Էյս» եւ «Լավագույն թատերախաղ» մրցանակների: Մոսկվայում 2004-ին մաս կազմելով «Արվեստի թատրոնի» խաղացանկին արձանագրել է մեծ հաջողություն, իսկ Մ. Նահանգներում ավելի քան մեկ տասնյակ, այդ թվում «Օզբոռն» եւ «Գարլընդ» մրցանակների: Միայն Նյու Յորքի «Century Center» թատրոնում բեմադրվել է 120 անգամ: Կալինոսկին ծնվել է Վիսկոնսինի Րեյսին քաղաքում: Ավարտել է «Կարնեգի Մելլոն» համալսարանի դրամայի բաժինը եւ մասնագիտացել է Լոս Անջելեսի «Ամերիկըն ֆիլմ» ինստիտուտում: Ներկայիս բնակվում է Վիսկոնսինի Օշկոշ քաղաքում եւ դասավանդում է տեղի պետհամալսարանի թատերական արվեստի բաժնում: Նոր հայերեն տարբերակի բեմադրության առթիվ բեմադրիչ Նանսի Իսսա Թորոսյանն ասել է. «Ցեղասպանութեան մերժումը... նոյն ատեն կ՛ոչնչացնե մարդկանց եւ ամեն մեկուն անցեալի հետքերը: Կ՛ոչնչացնե նաեւ ապագան, ստեղծելով չգոյութեան խաբկանքը: Մոռացում չէ, լռութիւն չէ, ստախօսութիւն չէ: Ցաւալիօրէն ժխտում է, մերժում: (սակայն) Քալինոսքիի ոչ հայ, օտար գրիչը, կը խնամե հայերուն վերքերը, կը փորձէ բուժել աշխարհի ցաւերը: Արեգակի ճառագայթներուն չափ, մոմի պզտիկ բոցով մը կը լուսաւորէ ճամբան»: Նորանոր հաջողություններ վերակազմավորված «Հայ բեմ» թատերախմբին եւ նրա պրպտող բեմադրիչին: | 
