ՈՉ-ՈՔԻ ԱՇԽԱՐՀԻ ՉԵՄՊԻՈՆԻ ՀԵՏ ՄՐՑԱՎԵՃՈՒՄ Փարիզում ընթացող Ալեքսանդր Ալյոխինի հուշամրցաշարի 3-րդ տուրում կենտրոնականն աշխարհի գործող չեմպիոն Վիշվանաթան Անանդի եւ Լեւոն Արոնյանի մրցախաղն էր: Մրցակիցները 41-րդ քայլին հաշտություն կնքեցին: Բավականին լարված մրցապայքարում անցավ Վլադիմիր Կրամնիկի եւ Մաքսիմ Վաշիե-Լագրավի պարտիան, որում մրցակիցներն անցողիկ զինվոր ունեին: Երկարատեւ պայքարից հետո 58-րդ քայլում գրանցվեց ոչ-ոքի: Միավորը բաժանեցին նաեւ Դին Լիժենն ու Լորան Ֆրեսինետը, Պյոտր Սվիդլերն ու Նիկիտա Վիտյուգովը: Վերջինն ավարտվեց Բորիս Գելֆանդի եւ Մայքլ Ադամսի մրցախաղը, որում եւս հետաքրքրական պայքար ծավալվեց: Ի վերջո Գելֆանդին հաջողվեց 77-րդ քայլին հաղթանակ տոնել, որի շնորհիվ Ադամսի ու Վաշիե-Լագրավի հետ 2 միավորով գլխավորեց աղյուսակը: Արոնյանը 1,5 միավորով Լորան Ֆրեսինետի, Դին Լիժենի եւ Վլադիմիր Կրամնիկի հետ բաժանում է 4-7-րդ տեղերը: Այսօր կայանալիք մրցաշարի 4-րդ տուրում Արոնյանը սպիտակներով կխաղա Պյոտր Սվիդլերի հետ: | 
