ԿՐԱԿՈՑՆԵՐ ԳՅՈՒՄՐԻՈՒՄ. ԵՐԿՈՒ ՏՈՒԺԱԾՆԵՐԻՑ ՄԵԿԸ ՄԱՀԱՑԵԼ Է, ԿԱ ՄԵԿ ՁԵՐԲԱԿԱԼՎԱԾ Գ. Մ. Երեկ Գյումրու կենտրոնական փողոցներից մեկում` «50-ամյակի կամրջից» ոչ հեռու, կրակոցներ են հնչել: Ժամը 13-ի սահմաններում «Գյումրի» բժշկական կենտրոնից ոստիկանության քաղաքային բաժնում ահազանգ է ստացվել, որ Շիրակացի 54բ շենքի մոտից հրազենային վնասվածքներով իրենց մոտ են տեղափոխվել քաղաքացիներ Հարություն Խաչատրյանը (քաղաքում հայտնի է«Քավոր Հարութ» անունով) եւ Արտյոմ Կարապետյանը («Շեկո»): Վերջինս հիվանդանոցում մահացել է: Մյուս տուժածը գտնվում է վերակենդանացման բաժանմունքում, նրա վիճակը գնահատվում է ծանր: Շիրակացի փողոցի դեպքի վայրին հարող հատվածը որոշ ժամանակ փակ է եղել: Ըստ ոստիկանության հաղորդման, դեպքի վայրի զննության ընթացքում հայտնաբերվել են արնանման հետքեր, ինքնաձիգի 4 պարկուճ, «Մակարով» ատրճանակի 3 պարկուճ եւ 1 կրակված գնդակ: Փաստի առթիվ հարուցվել է քրեական գործ ՀՀ քրեական օրենսգրքի 104-րդ հոդվածի հատկանիշներով: Ոստիկանության Շիրակի մարզային վարչության ծառայողների ձեռնարկած միջոցների արդյունքով, նշված հանցագործությունը կատարելու կասկածանքով Բագրատաշենի սահմանային անցակետից ոստիկանության Գյումրու բաժին բերման է ենթարկվել Գյումրու նախկին քաղաքապետ Վարդան Ղուկասյանի եղբորորդի Կոլյա Ղուկասյանը: Ոստիկանության հաղորդմամբ, ձեռնարկվում են անհրաժեշտ օպերատիվ-հետախուզական եւ քննչական միջոցառումներ սպանության դեպքի բոլոր հանգամանքները պարզելու նպատակով: Նախաքննությունը շարունակվում է: | 
