Ո՞ՒՄ ՇԱՀԵՐՆ Է ՊԱՇՏՊԱՆՈՒՄ ԴԵՂԱՐՏԱԴՐՈՂՆԵՐԻ ՈՒ ՆԵՐՄՈՒԾՈՂՆԵՐԻ ՄԻՈՒԹՅՈՒՆԸ Ի. Պ. Որ վերջին մի տարում դեղերը նկատելի եւ բավականին շատ թանկացել են ու շարունակում են թանկանալ, ակնհայտ է, ու դա կարող է հաստատել յուրաքանչյուրը, ով նույն դեղամիջոցից պարբերաբար կամ անընդմեջ օգտվում է: Սակայն Հայաստանի դեղարտադրողների ու ներմուծողների միության նախագահ Սամվել Զաքարյանը երեկ «Հենարան» ակումբում լրագրողներին հակառակն էր համոզում էր, թե դեղերը շատ չեն թանկացել, իր ասելով, վերջին մի տարում ընդամենը 3-4 տոկոսով, ինչն էլ կապված է դոլարի կուրսի, տրանսպորտային գների տատանումների հետ: Սամվել Զաքարյանը դեղերի թանկացումները կապում է նաեւ պահանջարկի հետ, ասելով, որ դեղեր կան թանկանում են առանձին սեզոնների, օրինակՙ գարնանը թանկանում են ալերգիայի դեղերը: Այսինքն` տվյալ դեղը թանկանում է, եթե տարվա այդ եղանակին դրա պահանջարկը մեծ է: Բանախոսը նշում է` կան դեղեր, որոնք էժանանում են, եւ նա այն կարծիքին է, թե գնային տատանումները մեծ չեն, ու գների բալանսը հիմնականում պահվում է: Սամվել Զաքարյանը որքան էլ պնդի, թե դեղերի գները շատ չեն ավելացել, նրա խոսքին հավատալը դժվար է, քանի որ նա հակված է պաշտպանելու շահերը հենց դեղարտադրողների ու ներմուծողների, որոնց միության նախագահն է: Նրա ղեկավարած միությունը ոչինչ չի անում դեղերի թանկացումները կանխելու համար, ասում է` ոչ մեկի բիզնեսին չեն խառնվում ու բիզնեսն է որոշում` ինչ ռազմավարություն ընտրել վաճառքի համար, իսկ դեղատունն էլ որոշում է, թե ինչքանո՞վ կվաճառի իր ապրանքը: Ստացվում է, որ Դեղարտադրողների ու ներմուծողների միության նախագահը պարբերաբար հանդես է գալիս մամուլի ասուլիսովՙ պաշտպանելու նրանց շահերը, ովքեր անբարեխիղճ կերպով անընդհատ թանկացնում են դեղորայքը: Հետեւաբար նրա կարծիքներն ու հայտարարությունները լուրջ ընկալել պետք չէ: |
