ՏԻԳՐԱՆ ԿԻՐԱԿՈՍՅԱՆՆ ԱՌԱՋԻՆ ՈՍԿԵ ՄԵԴԱԼԸ ՊԱՐԳԵՎԵՑ ՀԱՅԱՍՏԱՆԻՆ Կազանում ընթացող համաշխարհային ուսանողական խաղերում հայ մարզիկներին վերջապես հաջողվեց առաջին ոսկե մեդալը նվաճել: Չեմպիոնի կոչմանն արժանացավ սամբիստ Տիգրան Կիրակոսյանը, որը մինչեւ 52 կգ քաշային կարգում կանգնեց պատվո պատվանդանի վերին աստիճանին: Տիգրանն առաջին գոտեմարտում 4-2 հաշվով պարտության մատնեց ռուսաստանցի Վասիլի Կարաուլովին: Հաջորդ գոտեմարտում նրա մրցակիցը վրացի Գիվի Նադարեյշվիլին էր: Հայ սամբիստի առավելությունը բացահայտ էր: Հաղթելով 4-0 հաշվով, Կիրակոսյանը մտավ եզրափակիչ, որտեղ գոտեմարտեց ղազախ Բեյմբետ Կանժանովի հետ: Վճռորոշ գոտեմարտն էլ Տիգրանը վերելքով անցկացրեց եւ հաղթելով 4-1 հաշվով, արժանացավ ոսկե մեդալի: Մեծ էին սպասելիքները մինչեւ 74 կգ քաշային Մավրիկ Նասիբյանից: Սակայն դրանք չարդարացան: Առաջին գոտեմարտում 4-0 հաշվով հաղթելով իսպանացի Աարոն Բլանկոյին, հաջորդ գոտեմարտում հայ սամբիստը նույնպիսի հաշվով պարտվեց Ուզբեկստանի ներկայացուցիչ Իստամ Կուդրատովին եւ դուրս մնաց հետագա պայքարից: Մինչեւ 57 կգ քաշայինների մրցավեճին մասնակցած Գոռ Մայիլյանին էլ չհաջողվեց մրցանակակիր դառնալ: Առաջին գոտեմարտում նա 1-0 հաշվով հաղթեց ճապոնացի Մասանորի Արակիին, իսկ ահա 2-րդում զիջեց մոնղոլ Մարալ Չիմեդդորջին (0-8): Գոռն իրավունք ստացավ պայքարելու բրոնզե մեդալի համար, սակայն առաջին իսկ գոտեմարտում պարտվեց ուկրաինացի Միխայլո Իլիտչուկին (0-4): Կանանց մրցապայքարում Երջանիկ Կարապետյանը մինչեւ 48 կգ քաշային կարգում հաղթելով Կիզի Անարա Ժումալիին (12-1) մտավ հաջորդ փուլ, որտեղ զիջեց ռումինուհի Գաբրիելա Տասկուին: | 
