Տեղադրվել է` 2016-06-02 10:52:40 (GMT +04:00)

Ընթերցված է` 5232, Տպվել է` 525, Ուղարկվել է էլ.փոստով` 514

ՍԱՐՈՅԱՆԻ ՎԻՊԱԿԸՙ ԷԿՐԱՆՆԵՐՈՒՄ

Հ. Ծ.

Վերջերս Սոնոմայի (Հյուս. Կալիֆոռնիա) միջազգային կինոփառատոնում ցուցադրվել է «Իթակե» ֆիլմը, որը հիմնված է ամերիկահայ ճանաչված գրող Վիլյամ Սարոյանի «Մարդկային կատակերգություն» (1942) վիպակի վրա: Պատերազմի թեման արծարծող այդ ֆիլմը նկարահանել է ամերիկացի դերասանուհի Մեգ Ռայանը: Դա իր առաջին ռեժիսորական աշխատանքն է, որի համար փառատոնի կազմակերպիչները որոշել են նրան շնորհել Սոնոմայի «ողջույնի» մրցանակը: Ֆիլմը պատմում է Կալիֆոռնիայում երեւակայական Իթակե քաղաքի մասին: Համաշխարհային երկրորդ պատերազմի օրերին 14-ամյա Հոմեր Մակոլին որոշում է դառնալ իր քաղաքի հեռագրային հաղորդումները հեծանիվով ամենաարագ իրենց հասցեատերերին հասցնող փոստային աշխատողը: Ավագ եղբոր բացակայության ժամանակ (նա ծառայում է բանակում) իր այրի մոր, քրոջ եւ փոքր 4-ամյա եղբոր հոգսը Հոմերի ուսերի վրա է եւ նա ամեն ջանք գործադրում է պատվով կատարելու համար իր պարտականությունը: