ՆՈՐ ԿԱՌԱՎԱՐՈՒԹՅԱՆ ՈՐՈՇՈՒՄՆԵՐԻՑ Հուսով ենք` այս խորագիրը մշտապես պահել, քանի որ հանրությունն անհամբեր սպասում է այդ որոշումներին; Այսպես, նոր կառավարության երեկվա նիստում, տեսախցիկների եւ արագաչափերի եւ դրանց հետեւանքով քաղաքացիների նկատմամբ կիրառված տուգանքների հարցին անդրադառնալով` վարչապետ Նիկոլ Փաշինյանը հանձնարարեց ժամանակավորապես կասեցնել այդ գործունեությունը` օրենսդրությամբ հետագայում հարցը լուծելու համար: Արդարադատության նորանշանակ նախարար Արտակ Զեյնալյանն ու ոստիկանապետ Վալերի Օսիպյանը պետք է քննարկումների արդյունքում գտնեն հարցի լուծումը: Երեկվա նիստում ասվեց նաեւ, որ սկսվել է կառավարության ծառայողական մեքենաների կրճատումը, ինչպես նաեւ վերանայվելու են անարդյունավետ գործուղումները, որոնք հաճախ վերածվում են տուրիստական շրջագայությունների: Շատ ավելի կարեւոր էր վարչապետ Փաշինյանի անդրադարձը գյուղացիների վարկային բեռին, որը տույժ ու տուգանքերով քանի գնում-ծանրանում է: Վարչապետը Կենտրոնական բանկի նախագահ Արթուր Ջավադյանին հանձնարարեց, փոխվարչապետների հետ քննարկումներ սկսելով, մեխանիզմներ գտնել` տույժուտուգանքներից ազատելու գյուղացուն, որպեսզի նա հնարավորություն ունենա վարկ վերցնելով այգի մշակել ու բերք ստանալ: Քաղացիական ակտիվության օրերին բռնություններ եւ գույքի վնասում էին տեղի ունեցել կրիմինալ շրջանակների կողմից, վարչապետը հանձնարարեց բոլոր դեպքերի համար արագացված նախաքննություն իրականացնել եւ քրեական գործեր հարուցել` ոչ մեկը չպետք է անպատժելի մնա, ըստ վարչապետի: Նա ոստիկանապետից ակնկալում էր արագ եւ կոնկրետ գործողություններ: | 
