ՄԵՐՈՆՔ ՆԱՏՕ-Ի ՍԵՄԻՆԱՐՈՒՄ Մ. Խ. «Հարավային Կովկաս. աշխարհաքաղաքականություն, եվրատլանտյան ինտեգրում եւ ներքին մարտահրավերներ» խորագրով ՆԱՏՕ-ի խորհրդարանական վեհաժողովը տեղի ունեցավ ապրիլի 29-ից մայիսի 1-ը Թբիլիսիում: Հայաստանի խորհրդարանական պատվիրակությունը եւս մասնակցում էր, որի ղեկավար Կորյուն Նահապետյանն ու պատվիրակությունից Թեւան Պողոսյանը երեկ Ազգային ժողովում պատմեցին սեմինարի մասին: Ըստ ԱԺ տեղեկատվության` քննարկվել են տարածաշրջանային խնդիրներ, ինչպես օրինակՙ ռուս-վրացական փոխհարաբերությունների, Վրաստանի ժողովրդավարության ամրապնդման, Հայաստան-Ադրբեջան-Թուրքիա հարաբերություններին առնչվող հարցեր: Այս սեմինարն էլ, անկախ քննարկվող հարցերից, ադրբեջանցի պատվիրակներն օգտագործել են ռազմատենչ հայտարարությունների եւ «գրավյալ տարածքների» վերաբերյալ իրենց մշտական երգի համար, ինչը արժանացել է հայկական պատվիրակության անդամների համարժեք հակահարվածին: Ըստ Կ. Նահապետյանի` «Հայաստան-Ադրբեջան-Թուրքիա. տարածաշրջանային հաշտեցման խնդիրներ» թեմայի քննարկման ժամանակ խոսվել է նաեւ ԼՂ խնդրի մասին, մերոնք էլ ասել են, թե մինչեւ ԼՂՀ-ն որպես բանակցային կողմ չներգրավվի, բանակցություններում հնարավոր չի լինի տեղաշարժ արձանագրել: Սեմինարի շրջանակներում եւ Վրաստանի ղեկավարության հետ հանդիպումների ժամանակ քննարկվել են նաեւ ջավախահայության ինքնությանը, նրանց լեզվի ու մշակույթի պաշտպանությանն ու զարգացմանն առնչվող խնդիրներ, անդրադարձ է եղել նաեւ աբխազական երկաթուղու վերագործարկման անհրաժեշտությանը: Վրաստանի կառավարության բարձրաստիճան պաշտոնյաները կառուցողական ու շահագրգիռ մոտեցում են ցուցաբերել քննարկումների ժամանակ: |
